Къарачай-Черкесияны Башчысы Темрезланы Рашид Федерал казначействону тамадасы Роман Артюхин бла тюбешиб, бюджет ачханы файдалы хайырландырыуну юсюнден сёлешгенди.

Ала Роман Артюхин ишни юсю бла бизни республикагъа келген кёзюуде тюбешгендиле. Тюбешиуде этилген ушакъны юсюнден, республиканы Башчысы Темрезланы Рашид МАХ мессенджерде кесини аккаунтунда: «2026-чы джыл миллет проектлени толтуруу бла байламлы уллу ишле этилликдиле. Электрон сертификатла, кесаматла къалай толтурулгъанларына онлайн халда къарар мадар дегенча казначейство теджеген таблыкъла бизге ол ишлерибизни тыйыншлысыча баджарыргъа себеблик этедиле. Аланы хайырландырыуну юсюнден сёлешдик», – деб джазгъанды.
Башчы билдиргенден, арт кёзюуде сабий ачха да къошулуб, кърал ачха чыгъарыб, болушлукъ этиу кёб болгъаны бла байламлы тюбешиуде «Социальное казначейство» деген низамны хайырландырыугъа айырыб эс бёлюннгенди.
Темрезланы Рашид бла Роман Артюхин инфраструктураны джарашдырыугъа казначейство берген кредитлени юслеринден да сёлешгендиле. Ол таблыкъ бла бизни республика да хайырланыучанды. Казначейство берген кредит ачхагъа бизни республикада асламысына ЖКХ объектле джангыртыладыла.
Тюбешиуню ахырында КъЧР-ни Башчысы Темрезланы Рашид Федерал канзачействону тамадасы Роман Артюхиннге, РФ-ны Президенти салгъан борчланы толтуруугъа, миллет нюзюрлеге джетиуге аталгъан проектлеге кёлтюргючлюк этгени ючюн, разылыгъын билдиргенди.