Бу кюнледе Джёгетей Аягъы районда школланы сохталарыны арасында шашкаладан эришиуле болгъандыла.

Эришиуле Красногорка стансени орта школунда ётгендиле. Ол шашка спортну сюйген сохталаны бирикдиргенди.
«Эришиуле белгиленнген джорукъланы тамалында къуралгъан эдиле. Ол джарыкъ халда эмда уллу спорт джууаблылыкъда ётгенди. Эришиулеге къошулгъан сохтала дженгил сагъыш эте билгенлерин, тириликлерин, усталыкъларын танытхандыла», – деб билдиргендиле Джёгетей Аягъы районну администрациясында.
Эсеблеге кёре, эришиуледе биринчи орунну Джёгетей Аягъы шахарны 5-чи номерли орта школуну командасы алгъанды. Экинчи оруннга Элтаркъач элни орта школуну командасы, ючюнчю оруннга да Эски Джёгетей элни орта школуну командасы ие болгъандыла.
Алчы орунланы алгъанлагъа саугъала берилгендиле. Эришиулеге къошулгъанланы бары да джарыкъ сезимледен толгъандыла, сынам да алгъандыла.

(БИЗНИ КОРР.).