Гондарай ёзен сейирди. Былайы турист курортланы эм белгилилерини бириди. Мында не зат да башхаладан бир тюрлюдю. Ичи табигъатны кёб тюрлю ашхы затындан байды.

Бузладан саркъыб баргъан кёб ууакъ суу, кёлле, чучхурла бардыла. Ала минг джылланы мындан алда къуралгъан, адамлагъа ашхылыкъ келтирген сейир затладыла. Суула, къаяланы, ташланы джууа, шоркъулдай, джылтырай баш энгишге къуюла, адамны кеслерине тартадыла.
Гондарайны уллу чучхуру да аланы бириди. Ол, мийик къаядан энгишге секире, кюмюшча джылтырай, акъ къанатларын кенгнге джая, тёгерекге кюмюш бюрке, тюбюне, таш чауулгъа, къуюлуб, алайдан саркъыб бара, Гондарай суугъа къошулады. Аны къатында кёб тюрлю гокка ханс, кёкенле, къалын чегетле бардыла.
Гондарай сууну онг джанында да «Джанлы Къол Аягъы» джерде дагъыда бир ариу чучхур барды. Ол, 2 минг метр мийикликден джырлай келиб, 50 метрден аслам мийиклиги болгъан къаядан секиреди. Тар джерде болса да, ариу кёрюнеди. Бара-бара андан ууакъ чучхурла къураладыла, ала бары да Гондарай суугъа къошуладыла. Тюз къатына баргъан къыйын болса да, адамла, арлакъдан къараб, аны ариулугъундан тоялмай, талай заманны турадыла. Гондарай ёзенде дагъыда уллу, гитче да кёб чучхур барды. Чокъуракъ суула, таза дарман хауа адамланы саулукъларын бегите, алагъа учунмакълыкъ, джумушакълыкъ, къууанч келтиредиле.

Лепшокъланы Хусеин.