Медицинада дарманладан сора да аурууну багъаргъа кёб тюрлю мадар барды. Аланы ичинде физиотерапия ал орунланы бирин алады. Физиотерапияда озон бла багъыу кенг хайырландырылады. Ол солуу органларында инджиулери, джюрек-къан тамыр ауруулары болгъанлагъа, ашхынлары ауругъанлагъа дагъыда башхалагъа иги джарайды.
Озонотерапияны магъанасы – медицина аппаратны кючю бла озон-кислород къатышма физрастворгъа неда тюз суугъа къуюлады. Физраствор адамгъа къан тамырла бла ийиледи, сууну уа ичерге тыйыншлыды. Аланы къайсысы этилирге кереклисин врач белгилейди.
Черкесск шахарда орналгъан Багъыу-реабилитацион аралыкъда да озонотерапия кенг хайырландырылады. Артыкъсыз да, коронавирусдан сора солуу органлары иги ишлемей, эски ауруулары къозгъалгъан адамлагъа озон иги джарагъанды. Бюгюнлюкде да аралыкъда ол процедура ауругъанлагъа этилгенлей турады.
Багъыу-реабилитацион аралыкъны баш врачыны орунбасары Лайпанланы Саида айтханнга кёре, аралыкъда озонотерапия кабинет 2018-чи джылдан бери ишлейди, ол процедура кёб адамгъа этиледи.
– Озонотерапия биз медицина реабилитацияда хайырландыргъан мадарланы бириди. Ол джукъмагъан, джюрек-къан тамыр ауруулары болгъанлагъа, ашхынларында, солуу органларында къыяулары болгъанлагъа этиледи. Озон къан тамырланы кенгертеди, къан иги джюрюрча этеди, адамны сау клеткаларын къоруулайды. Аны бла бирге гастроэнтерология бёлюмде джатханла озону болгъан сууну ичедиле. Ол ашхын джараланы, эрозияланы дженгил сау этерге болушады, гастритлери болгъанланы халларын иги этеди. Былайда бир затны чертерге излейме: озонотерапия ауруу сёл болгъан заманда этиледи. Озон косметологияда да хайырландырылады, ирин этген джараланы сау этерге болушады. Бизни аралыкъда озонотерапия кабинетге уллу иш сынамы болгъан медсестра Хачирланы Земфира, Исмаилны къызы, джууаблыды. Кабинет керекли оборудование бла баджарылгъанды, – дейди Лайпанланы Саида.
Багъыу-реабилитацион аралыкъны баш врачыны орунбасары бла ушагъыбыздан сора озонотерапия этилген джерге бардыкъ. Ол аралыкъны стационар корпусуну биринчи этажында орналыбды. Ары кирсенг, кирсизликни, медицина къуллукъчула хар адамгъа къайгъырыуларын танытханларын кёресе.
Хачирланы Земфира аралыкъда 2019-чу джылдан бери ишлейди. Ары дери алгъаракълада Правокубанский посёлокда орналгъан реабилитацион аралыкъда бёлюмню тамада медсестрасы, аралыкъны баш медсестрасы болуб ишлеб тургъанды. Артда Черкесскеде Багъыу-реабилитацион аралыкъгъа ишге чакъырылгъанды.
– Ишими бек джаратама. Былайда ауругъанлагъа джараулу кёб иги зат барды. Неврология, кардиология, терапия, гастроэнтерология бёлюмледе джатханлагъа озонотерапия иги болушады. Медицина аппаратны болушлугъу бла озон физрастворгъа къуюлады, ол ауругъаннга капельница бла ийиледи. Ашхынлары, ичегилери ауругъанлагъа озонну суугъа къуюб да ичиребиз. Аллай сууну эртденбла ач къарангылай ичерге керекди. Айтыргъа, мен врач сууну неда капельницаны буюргъанына кёре этеме. Кабинетде бир джолгъа юч адамгъа процедура этерге болады. Санларын эркин къымылдаталмагъанлагъа, кемизлилеге озонну палаталарына барыб салабыз. Терапия бёлюмде СВО-ну ветеранлары да бардыла, алагъа бизни аралыкъда уллу эс бёлюнеди. Аскерчиле да озонотерапияны джарагъаннга санайдыла. Мыйыларында къан иги джюрюмегенлеге (ишемия) озонну эслеб, акъырын иебиз. Инсульт джангы болгъанлагъа уа озон этерге джарамайды, арадан бир талай ай ётерге керекди. Озон къуру да ауруула къозгъалмагъан заманда этиледи. Диабетлери болгъанлагъа да озон иги джарайды, ол шекерлерин орнуна келтирирге болушады. Озонотерапия къаллай бир этилирге кереклиси адамны ауругъанына кёре болады, кёбюсюне беш кюн этиледи, он кюн этерге да болады. Бизге стационарда джатханланы тышында да, саулукъларына кюндюзгю стационарда неда амбулатор халда къаратханла да келедиле. Кёбюсю къууаныб кетедиле, джарагъаннга санайдыла», – деб хапар айтады Хачирланы Земфира.
Алайды да, Багъыуреабилитацион аралыкъда ауругъанлагъа реабилитация этерге джораланнган кёб тюрлю мадар хайырландырылады. Биз башында айтхан озонотерапия да аланы бириди. Ол процедураны этдиргенле разы болуб кетедиле.
САЛПАГЪАРЛАНЫ Умар.
