Къарачай-Черкесияда къытай тилден Эресей олимпиаданы биринчи кере джергили этапы бардырылгъанды. Ол быйыл башил (январь) айны 26-да эмда 27-де ётгенди, анга къытай тилни окъугъан эки 10-чу класс къошулгъанды. Джергили тур джазма эмда айтыу халда бардырылгъанды.

– Джазма халда бардырылгъан сынау ишде сохтала аудированиеден билимлерин кёргюзгендиле, текстле бла ишлегендиле, лексика-грамматика тестированиеден ётгендиле, лингвистика бла байламлы соруулагъа джууаб бергендиле, изложение джазгъандыла, халатсыз джаза билгенлерин дагъыда башха усталыкъларын танытхандыла, – деб хапар айтхандыла КъЧР-ни Окъуу бла илму министерствосунда. Джазма халда бардырылгъан сынау ишге 180 такъыйкъа берилгенди.
Айтыу халда бардырылгъан сынау ишде сохтала 5-7 такъыйкъаны ичинде кеслери хазырлагъан ток-шоуну, акъыл оюнну, дискуссияны кёргюзгендиле.
Олипиаданы эсеблери, байрым (февраль) айны 10-дан кечге къалмай, КъЧР-ни Окъуу бла илму министерствосуну сайтында басмаланныкъдыла.
Хорлагъанла эмда алчы орунлагъа ие болгъанла Эресей олимпиаданы ахыр этапына къошуллукъдула. Ол алтотур (март) айны 14-ден хычаман (май) айны 3-не дери Эресей Федерацияны 13 субъектинде эмда «Сириус» федерал территорияда бардырыллыкъды.