Къарачай-Черкесияда беш минг чакълы бир сабий ючюнчю окъуу чакъларын (четверть) уллу кёл кёлтюрюлюм бла башлагъандыла – ала кеслерини школларында окъуб тебрегендиле.

Тамамлы ремонтдан сора республиканы тёрт окъуу учреждениеси сабийлеге эшиклерин кенг ачханды: Черкесскеде 5-чи номерли гимназия, Ючкекенде Ёзденланы Мусса атлы 2-чи номерли орта школ, Первомайское элде Тамбийланы Абдулла атлы 6-чы номерли школ, Кавказский посёлокда Дмитрий Стариков атлы орта школ.
Школланы барында да инженер сетле ауушдурулгъандыла, аланы башларын джангыдан джабхандыла, эшиклерин, терезелерин джангыртхандыла, ичлерин ариу джарашдыргъандыла. Эки школну уа тыш къарамларын да тюрлендиргендиле.
Сабийлеге кирсиз, джылы классла теджелген бла бирге, заманны излемине джууаб этген хант юйле, оборудование да саугъа этилгендиле. Фахмуларын ачыкъларгъа, классдан тышында дерсле бардырырча таблыкъла да къуралгъандыла.
КъЧР-де, «Джаш тёлю бла сабийле» миллет проектни «Эм игисин сабийлеге» деген федерал проектин джашаугъа сингдире, кёб окъуу-билим берген учреждениеге тамамлы ремонт этилгенди. Мындан ары да иш сериуюн боллукъ тюлдю. Быйыл регионда онбир мекямдан къуралгъан тогъуз школгъа ремонт этилликди. Аланы тёртюсюн джангыртыу 2025-чи джыл башланнганды.