Ленинградны къуршоугъа тюшгенин эсгере, Къарачай-Черкесияны «Авангард» аскер-патриот аралыгъы «Блокаданы ётмеги» деб мероприятие бардыргъанды.

– Арадан онла бла джылла ётселе да, джау къуршалагъан Ленинградны къоруулагъанла, анда джашагъанла, хорламны келтирир ючюн кюрешгенле эсдедиле. Къарачай-Черкесияны джамагъатыны ичинде да бардыла анда берилген 125 грамм ётмекни татыуун кёргенле. Бизни джердешлерибиз да уруш этгендиле Ленинградны азатлар ючюн, республиканы тиширыулары, Ленинграддан келген сабийлеге эшиклерин кенг ачыб, джылыу бергендиле, аналыкъ этгендиле, – деб джазгъанды КъЧР-ни Башчысы Темрез улу кесини телеграм-каналында.
Ленинград къуршоугъа 1941-чи джыл къыркъаууз (сентябрь) айны 8-де тюшгенди. Азатланнганы 1944-чю джылны башил айыны 27-ди. 872 кюнню шахарны миллети, ачлыкъ, джаланнгачлыкъ да сынаб, кёб инджилгенди. Джюз мингле бла адамла ачдан, сууукъдан эмда фашистле атхан бомбаладан ёлгендиле. Ленинград шахарны къуршоугъа алыннганы Уллу Ата джурт къазауатны эм ачы къыйынлыкъларыны бириди.
Мероприятиени кёзюуюнде сабийле кёб затдан хапарлы болгъандыла, аскер къаугъагъа къошулгъан аскерчи Ислам Баисов бла да тюбешгендиле.