Аскер къаугъада Ата джуртубузну къоркъуусузлугъун сакълагъан джигит уланларыбызгъа Къарачай-Черкесиядан кёзюулю гуманитар болушлукъ ашырылгъанды. Бу джол джюкню Уруп район джибергенди.

Гуманитар болушлукъ азыкъдан эмда аскерчилеге керекли затладан къуралгъанды. Аны «Кесибизникилени кёлтюрейик» деген джамагъат къауумну келечилери бла Уруп районда Ата джуртну аскерчилерини юйдеги комитети хазырлагъандыла.
– Биз ашыргъан джюк – уллу кёлтюргючлюкдю. Анда аскерчилеге керекли затладан сора да юйдеги джылыу, юйдеги къайгъырыу барды. Аскерчилени юйдегилери кимден да иги биледиле алагъа эм бек керекли зат не болгъанын. Бу ишге юлюш къошхан адамланы барысына да уллу разылыгъыбызны билдиребиз, – деб чертгендиле Уруп районну администрациясында.
Белгилисича, КъЧР-ни Башчысы Темрезланы Рашидни башламчылыгъы бла аскер къаугъагъа къошулгъанлагъа эмда аланы юйдегилерине болушлукъ этиуге джораланыб къуралгъан республикан штабны юсю бла бардырылады бютеу иш.
Алгъаракъда Хабез районну «Родные сердца» деген башламчылыкъ къаууму ашыргъанды аскер къаугъагъа къошулгъанлагъа гуманитар болушлукъ. Анда дарман-дары, чурукъла, джылы кийимле, шай, кофе, джау чыракъла дагъыда башха затла болгъандыла.