КъЧР-ни Башчысы Темрезланы Рашид Ильичевское элде библиотеканы быйыл заманны излемине кёре джангыртыллыгъын МАХ мессенджерде баямлагъанды.

Башчы билдиргенден, 60 джыл чакълы бир болгъан библиотека конкурсда хорлагъаны себебли, аны тамамлы ремонту «Юйдеги» деген миллет проектни тамалында этиллик ишлени тизимине къошулгъанды. Анча заманны ичине ол элде маданият аралыкъ болуб бошагъанды. Джангыртылгъанындан сора уа, ары бусагъатдан да кёб адам барлыгъы хакъды.
Джангы тюрсюн алгъан, таб джарашхан, аламат мекямны ичинде адамла мультимедия эмда цифра керекле бла хайырланыр, билимлерин ёсдюрюр, тюбешиуле къурар, мастер классла кёргюзюр мадарла табарыкъдыла. Библиотеканы баш байлыгъы – 3 мингден аслам китабы – сакъланнган бла къалмай, джангы китабла бла байындырыллыкъды.
Ол халда джарашдырылгъан аламат библиотекала бусагъатда бизни республиканы Гитче Къарачай, Абаза, Джёгетей Аягъы районларында бардыла. 2030-чу джылгъа дери аллай маданият аралыкъла Къарачай-Черкесияны бютеу муниципал районларында да къураллыкъдыла.