Башил (январь) айны 29-да РФ-ны Вице-премьери Марат Хуснуллин Эресей Федерацияны Правительствосуну регионал ёсюмюню хакъындан комиссиясыны президиумуну кенгешин бардыргъанды. Ол кенгешге видеоконференция халда КъЧР-ни Башчысы Темрезланы Рашид да къошулгъанды.

Кенгешде озгъан джыл «Инфраструктура для жизни» деген миллет проект бла «Строительство» деген кърал программаны тамалында баджарылгъан ишлени эсеблери чыгъарылгъандыла, быйыл ол джаны бла этилген нюзюрлеге джетерге себеб боллукъ магъаналы ишле да белгиленнгендиле.
Анда айтылгъаннга кёре, Къарачай-Черкесияны шахарларында таб болум къураугъа аталгъан къурулуш ишле быйыл да тири бардырыллыкъдыла. Оюлургъа джетген юйледе джашагъанланы кёчюрюу, ЖКХ объектле, джолла ишлеу, билим бериу, саулукъ сакълау учреждениелени джангыртыу дегенча ишле да салыннган планнга кёре этилликдиле.
Кенгешде айтылгъанны юсюнден Темрез улу кесини социал сетлеринде: «Марат Шакирзянович бютеу Эресейде 2025-чи джыл хайырланыугъа берилген юйлени саны бир да кёб болгъанын, къралыбыз ол джаны бла тарихде эм уллу кёргюзюмлеге джетгенин чертгенди. Быйыл толтурургъа керекли борчларыбызны да айтханды. Ол салгъан борчланы федерал органла эмда КъЧР-ни Правительствосу бла бирге джетишимли толтурургъа кюреширикбиз», – деб джазгъанды.