Башил (январь) айны 28-де Къарачай-Черкесияны Правительствосунда бардырылгъан кенгешде магъаналы ишлеге аталгъан ашхы башламчылыкъланы джашаугъа киргизиуню оноуу этилгенди.

Республиканы Премьер-министри Мурат Аргуновну башчылыгъы бла ол кенгешге къошулгъанла, 10 магъаналы ишни сюзюб, АПК-ны игилендириуге, миграцион политиканы тыйыншлы бардырыугъа, сабийликге джакълыкъ этиуге себеб боллукъ ашхы башламчылыкъланы джашаугъа киргизирге дегендиле.
Алайда «О порядке подачи заявок на получение государственной поддержки в сфере развития сельского хозяйства и устойчивого развития сельских территорий» деген законну проекти бла байламлы Правительствону джангы бегимини проекти джараулугъа саналгъанды. Ол проектни КъЧР-ни эл мюлк министри Биджиланы Умар теджегенди. Анда малчылыкъ, джерчилик бла кюрешген адамлагъа, мюлклеге кърал болушлукъ этиуню джоругъу белгиленнгенди. Ол министерство бла кърал болушлукъ излегенни араларында иш джюрютюуню тамалын законда бегитир нюзюр бла джарашдырыла турады.
Кенгешде «О создании Межведомственной комиссии по вопросам социальной и культурной адаптации иностранных граждан» деген, власть бла джамагъат бирлешликлени иш джюрютюулерини джоругъун бегитиуге аталгъан бегимни проекти да сюзюлгенди. Аны КъЧР-ни миллет ишлерини, кёбчюлюк коммуникациялары бла басмасыны хакъындан министри Мурат Есенеев теджегенди. Ведомствола арасы комиссия тыш къралладан келгенлени бизни регионда орунлу этиуге къарарыкъды.
Правительствону къуллукъчулары 2025-чи – 2027-чи джыллада ёксюзлеге, джакъсызлагъа къараугъа джууаблы органланы ишлерин игилендириуге аталгъан концепцияны тамалында этиллик ишлени планын да хайырландырыргъа джараулугъа санагъандыла. Аны КъЧР-ни урунуу бла социал ёсюмню хакъындан министри Хачирланы Кемал теджегенди.
Белгиленнген ишле ол планнга кёре баджарылсала, акъыл-балыкъ болмагъан, джакъсыз сабийлени джашаулары танг кесекге маджал боллукъду.
Аны кибик кенгешде КъЧР-ни башха министерстволары бла ведомстволары теджеген проектлеге да къаралгъанды.