Озгъан барас кюн Къарачай-Черкесияны Башчысы Темрезланы Рашид бла РФ-ны Миллет гвардиясыны Шимал Кавказ федерал округда Жуковну орденин джюрютген аскерлерини башчысы Владимир Спиридонов тюбешиб, бизни регионда рахатлыкъны сакълар, джамагъатны къоркъуусузлугъун иги бегитир мадарланы сюзгендиле.

Владимир Спиридонов Шимал Кавказны регионларына ишини юсю бла айлана келиб, бизни республикагъа да къонакъ болгъанды. Темрез улу да аны бла ол мында кёзюуде тюбешгенди.
Тюбешиуде Къарачай-Черкесияда тынчлыкъны, джорукъну сакълау дегенча ишлени юслеринде регионну власть органлары бла ведомствону арасында иш джюрютюуню юсюнден сёлешиннгенди.
Владимир Спиридонов Миллет гвардияны КъЧР-де управлениеси бла регионну башчылыгъы къоркъуусузлукъну бегитиу бла байламлы ишлени келишиулю баджаргъанларын чертгенди.
Къарачай-Черкесияны Башчысы Темрезланы Рашид бла РФ-ны Миллет гвардиясыны Шимал Кавказ федерал округда Жуковну орденин джюрютген аскерлерини башчысы Владимир Спиридонов мындан ары да кёбчюлюк къошулгъан ишлени къурагъан кёзюуде адамланы къоркъуусузлукъларын бегитиуге айырыб эс бёлюрге оноулашхандыла. Ала СВО-гъа къошулгъанлагъа, аланы юйдегилерине болушлукъ не джаны бла да этилирге кереклисин чертгендиле.
Тюбешиуню юсюнден КъЧР-ни Башчысы Темрезланы Рашид МАХ мессенджерде кесини аккаунтунда къралыбызны Президенти къоркъуусузлукъну бегитиу бла байламлы салгъан борчланы толтурууда регионну башчылыгъы бла келишиулю ишлегенлери ючюн, Владимир Леонидовичге да, бютеу миллет гвардиячылагъа да разылыгъын билдиргенди.
«Къарачай-Черкесияны тынчлыгъын сакълаугъа аталгъан ишлерибизни мындан ары да къайгъырыулу баджара барлыкъбыз», – деб джазгъанды.