Республиканы белгили адамларыны бири, Социалист Урунууну Джигити, КъЧР-ни эл мюлкюню махтаулу ишчиси Датка Карович Кишаев бу кюнледе дуниясын ауушдурду.

Аны юй ахлуларына къайгъы сёз бере, Къарачай-Черкесияны Башчысы Темрезланы Рашид МАХ мессенджерде кесини официал аккаунтунда былай джазгъанды:
«Къазауатдан сора къралны халкъ мюлкюн аякъ юсюне салгъан тёлюню келечиси Датка Кишаев бютеу кючюн-къарыуун, билимин» фахмусун туугъан джуртуна къуллукъ этиуге берген эди. Аны урунуу джолуну аллы, ахыры да «Къобан» колхоз-репродуктор бла байламлы эди. Ол анда тракторист болуб, урунууну алчыларыны тизимине джашлай огъуна къошулгъан эди. Джерге сюймеклигин ол сабийлерине, туудукъларына берген эди, ала да, аны ызы бла атлай, кесича хунерлиле, джигерле болгъандыла. Ол джамагъат-политика джашаугъа да тири къошулгъан адам эди, КПСС-ни обкомуну къурамында эди эмда СССР-ни Баш советини депутаты эди.
Датка Карович джангы Къарачай-Черкесни айныууна, аны экономикасыны ёсюмюне да уллу юлюш къошхан кишиледен эди. Эл мюлкню ёсюмюнде уллу къыйыны ючюн «Социалист Урунууну Джигити» деген сыйлы атха эмда талай башха кърал саугъалагъа тыйыншлы болгъан эди. Аланы арасында Урунууну Къызыл Байрагъыны эмда «Хурмет Белгиси», артдаракъда «Къарачай-Черкес Республиканы аллында махтаулу ишлери ючюн» деген орденле бардыла.
Датка Карович тамам тюз иннетли, джорукъну, мизамны сюйген, халал джюрекли, джарыкъ адам эди. Бизни эсибизде да аны сыфаты ол халда сакъланныкъды.
Аны эт-джен адамларына, тенглерине, шохларына къайгъы сёз беребиз. Аны джашаудан кетгени саулай Къарачай-Черкесиягъа къайтмазлыкъ къоранчды».