Псыж элде джашагъан 47 джыл болгъан бир эркиши белгили эресейчи интернет-сервислени биринде машинасына двигатель сатыб алыргъа излегенди.

Ол, къарай барыб, кеси излеген керекни табханды. Эркиши, сатыучу бла байламлылыкъгъа чыгъыб, аны багъасыны, джашагъан джерине келтириуню юсюнден келишгенди.

Ызы бла ол сатыучу берген банк счётха 67 минг сом ачха ашыргъанды. Алай а, эркиши ачха тёлегенинден сора товарны алмагъанды. Ол сатыучу бла джангыдан байламлылыкъгъа чыгъаргъа кюрешсе да, джукъ эталмагъанды. Кесин алдатханын ангылагъанында, полициягъа барыб, тарыгъыу джазгъанды.
Эресейни МВД-ны Черкесск шахарда бёлюмюню къуллукъчулары, оператив-излеу ишле бардырыб, аманлыкъчыны ачыкълагъандыла. Ол Тверь областда джашагъан 46 джыл болгъан эркиши болуб чыкъгъанды. Бусагъатда ол эркиши башха аманлыкъ иш ючюн тутулуб турады. Бизни джердешибиз ачха ашыргъан банк счёт башха адамны атына джазылыб тургъаны да ачыкъланнганды.
Полицияны къуллукъчулары бу ишни юсю бла терслеу иш ачхандыла, аны тамалында тинтиуле бардырадыла.
Къарачай-Черкесияны сыйлы джамагъаты! Интернетде сатыу-алыу этген заманыгъызда сатыучуну, ол сатхан затланы юслеринден джазылгъанны эс бёлюб окъугъуз. Алыучуланы аманлыкъчыладан къоруулагъан къоркъуусуз сайтла бла хайырланыгъыз. Мадар бар эсе, алыргъа излеген затыгъызны багъасын толу тёлерге ашыкъмагъыз.

КъЧР-ни МВД-ны пресс-къуллугъу.