Зеленчук районну ара библиотекасы саулай Эресейде бардырылгъан «На своем языке» деген библиотека проектлени конкурсуна къошулуб, «Лучшее событие» номинацияда алчы болуб, энчи диплом бла саугъаланнганды.

«На своем языке» деген конкурсну РФ-ны Маданият министерствосу бла Эресейни Библиотека ассоциациясыны болушлукълары бла Джаш тёлюге джораланнган эресейчи кърал библиотека бардыргъанды. Къралны ана тиллени хакъындан политикасын джакълау бла байламлы библиотекаланы эм эги сынамларын ачыкълау, алагъа кёл бериу, Эресейни халкъларыны маданиятлары бла тиллерин сакълау конкурсну баш муратлары эдиле. Ол юч номинацияда бардырылгъанды – «Лучший ресурс» (сайтла, подкастла, басма неда медиапроектле), «Лучший долгосрочный проект» (кёзюу-кёзюую бла бардырылгъан джыйылыула, фестивалла, мастер-классла), «Лучшее событие» (бир кере бардырылгъан иш, акция, фестиваль).
Конкурсха Эресейни тюрлю-тюрлю регионларыны библиотекалары къошулгъандыла. Аланы къуллукъчулары РФ-ны халкъларыны ана тиллерин, маданиятларын сакълаугъа аталгъан кёб сейир проектни теджегендиле.
Алайды да, Зеленчук районну ара библиотекасы конкурсда «Къарачай тилим – Ана тилим» деген проектни теджегенди. Аны къурамына район библиотеканы усталары къарачай тилге кёчюрген «Джуммакъчыкъ» («Колобок») деген таурухну гинджи (кукольный) театр этиб кёргюзюу да киргенди. Зеленчук районну библиотекасыны къуллукъчуларыны ишлерине конкурсну къурагъанла уллу багъа бергендиле.
«Библиотеканы коллективи хазырлагъан иш саугъагъа тыйыншлы болуб, къралыбызны эм иги проектлерини тизимине къошулгъанына бек къууаннганбыз. Мындан ары да аллай магъаналы конкурслагъа къошула турургъа муратлыбыз», – дегенди Зеленчук районну ара библиотекасыны директоруну орунбасары Чауушланы Рита.
Айтыргъа, конкурсну эсеблерине кёре, «Банк библиотечного креатива» деген площадкада библиотека проектлени тизими къуралгъанды. Анда къралны библиотекаларыны эм иги сынамлары бла ким да шагъырей болургъа боллукъду.

Салпагъарланы Умар.