Китаб тапхабызда энтда бир ашхы китаб орун алды Къарачай-Черкесияны халкъ поэти Лайпанланы Билалны эсгериуге атаб, «Сиреневый Салон» деген литература-музыка бирлешлик «Будь горд, потомок вольного народа!» деген джыйым китаб чыгъаргъанды.

Анга Эресейни джер-джеринден, аны бла къалмай, тыш къралладан да 65 поэтни назмулары тюшгендиле. Китабны КъЧР-ни, Москваны, Приморск крайны эмда бирси регионланы кърал библиотекаларына бергендиле.
– «Сиреневый Салон» бирлешлигибизни кючю бла бизни республика дунияны адабият картасында белгилене башлагъанды, – дейди бирлешликни тамадасы Багъатырланы Шахриза.
Литература бирлешликни къурагъан, аны юсю бла бютеу Эресейге, тыш къраллагъа дери да бизни литературабызны, бютюн да бек поэзиябызны, чеклерин кенгертиб кюрешген Багъатырланы Шахризады – поэт, тылмач, Эресейни Джазыучуларыны, Журналистлерини да къурамларында болгъан къаламчы. Ол «Сиреневый Салоннга» да кесича фахмулу поэтлени, музыкантланы, джырчыланы джыйгъанды. Аны тирилиги бла бирлешлик кёб тюрлю джарыкълыкъ ишле бла атын айтдырады. Сёз ючюн, республикада биринчи болуб, 2022-чи джылда школ сохталаны араларында «Пою тебя, мой край родной!» деген конкурсну къурагъан да ол эди.

(Бизни корр.).