«Архыз» курортда «Центр адаптивного спорта и туризма Архыз 2.0» деген аралыкъ ишин тыйыншлы дараджада бардырады. Ол быйыл башил (январь) айны 25-де джангыдан эшиклерин ачханды.

Ол аралыкъ «Мантера» деген сууаблыкъ фондну башламчылыгъы бла ачылыб ишлегенли экинчи джыл барады. Аралыкъ ол заманны ичинде курортну социал инфраструктурасында энчи орун алыб, адамлагъа таблыкъла къурайды. Аны озгъан джыл бардыргъан иши да терен магъаналы эди. Былайда саулукълары къолайсыз болгъан 43 сабий 300 сагъат заманны солугъанды, саулугъун тюзетгенди. Сакъат сабийлени саулукъларын бегитиуге аталгъан программагъа Эресейни бютеу регионларындан юйдегиле къошуладыла. Озгъан джыл ары Къарачай-Черкесия бла Ставрополь крайдан кёб сабий баргъан эди. ШКФО-ну регионларындан, Москва тёгерекден келгенле эмда башхала бар эдиле.
Ол аралыкъгъа 4 джылдан 18 джылгъа дери сабийле барыб, тау лыжала бла учаргъа юренедиле. Бу ашхы программа хакъсыз джашаугъа киргизиледи. Къарачай-Черкесиядан ары атланнган юйдегилеге къыйналмай, барырча, келирча мадарла къуралгъандыла.
Быйыл аралыкъ «Лунная деревня» деген элде энчи мекям алыб, аны хар затын джарашдыргъанды. Анда сабийлеге, аталагъа, аналагъа таб болум къуралгъанды. Былайда кёб ашхы зат ишлейди, хар не да таб джарашыбды.
Уста инструкторла сабийлеге терен къайгъырыб къарайдыла. Керекли снаряжение толусу бла табылады. Иш этиб, сабийлени юретиуге деб белгиленнген джерде хал иги къуралгъанды. Аталаны, аналаны тургъан, сакълагъан джерлери да игиди. Трансфер ишлейди.
Ары барыргъа излеген алгъаракъдан онлайн халда джазылыргъа боллукъду.
Бу программа Мантера бла аны фондуну, «Лига мечты» деген АНО-ну, КъЧР-ни Туризм бла курортланы эмда Физкультура бла спортну хакъындан министерстволарыны джакълыгъы бла джашаугъа киргизиледи.

Узеирланы Хусей.