Кюн таякъла джашил джуртлагъа, таулагъа, ёзенлеге чокъуракъ суулагъа салам бериб, джерге нюр джарыкъ тёгедиле. Мында мермер ташладан джылтырай, тюрлю-тюрлю чегетледен джасалыб, сууланы кёксюл шоркъалары шоркъулдай, тёгерек сейир тюрсюн алгъанды.

«Шумка» чучхур да тамашалыкъ къурагъан ашхы сууланы бириди. Аны ариу толкъунлары бурулуб къайнай, джырла джырлай, табигъатха къууат сала, баш энгишге барадыла. Ол Тебердиден бир километр узакълыкъда, субай, къалын наз чегетлени ичинде, тенгизден 1500 метр мийикликде орналгъанды. Тауушу узакъдан эшитилсе да, кеси къатына джетгинчи кёрюнмейди. Сууу андан ёргеде къуралгъан кёлден келеди. Бу чучхур 12 метр мийикликден къуюлады. Ол къызыу баргъаны амалтын, тюбюнде чунгур къурагъанды, аны ичи тап-таза суудан толубду. Чучхур, кюмюш тамчыла тёкген уллу акъ шоркъа болуб, энгишге мыллык атады. Джыл сайын, къаяны ашаб, теренден-тереннге барады. Алайдан энгишге саркъа, Теберди суугъа къошулады. Былайыны ариулугъу айтыб-айталмазчады, туристле бери келирге бек сюедиле.
Адамла бу кёб шоркъалы акъ чучхургъа къыйналмай барадыла. Ала джюрюген джол теблениб белгилиди. Джолну сол джанында «Шумка» суу барады. Чучхурну таза сууу, алайыны хауасы, табигъатны ариулугъу адамны рахат этиб, кючюне кюч къошуб, учар къанатла береди.

Лепшокъланы Хусеин.