Къарачайны акъыл, фахму, билим кючюн мийикге чыгъаргъан белгили, онглу джашларыны бири эди Орусланы Сюлеменни джашы Бийболат. Ол, туугъан халкъына халал къуллукъ эте, джюрек джарыгъын адамлагъа тёге джашагъанды.

Бийболат 1962-чи джыл алтотур (март) айны 11-де Огъары Тебердиде Сюлеменни халкъны ашхы адетлерин багъалатхан, адебин, намысын мийикде тутхан юйдегисинде туугъанды. Орта билим берген школда окъугъандан сора, Черкесскеде медицина училищени бошагъанды. Таулу джаш, билимин андан ары ёсдюре, Ставрополдагъы эл мюлк институтха кириб, аны джетишимли тауусады. Усталыгъыны юсю бла атын сый бла айтдырыб ишлегенди. Бу санагъатны ишине джангы амалла, мадарла киргизе, тутхан ишин мийик дараджада толтургъанлай тургъанды. Ол билим джолда таукел алгъа бара, Эресейни Ич ишлерини министерствосуну Санкт-Петербургда университетине тюшюб, ол баш окъуу заведениеде да иги окъуб, атын айтдырыб, «юрист» усталыкъ алыб чыкъгъанды. Юристлик ишин бардыра, бу джаны бла кёб ашхы иш эте, фахмулу, билимли, сынамлы уста болгъанын танытханды. Шохлукъгъа, тенгликге, кертиликге, тюзлюкге къанат кере, аны талпыу кючю мийикге чыгъаргъанды. Бу санагъатха къошхан энчи чыгъармачылыкъ юлюшюн эсге алыб, кърал Бийболатха «Къарачай-Черкес Республиканы махтаулу юристи» деген сыйлы атны атагъанды.
Орус улу гитчеликден спорт бла да кюрешгенди. Ата-бабадан келген миллет тутушну иги билгенди. Спортну бу ашхы тюрлюсю аны джигерликни, джигитликни, эркишиликни, тюзлюкню, шохлукъну, къарнашлыкъны джолунда ашхылыкъгъа элтгенди. Ол кёб тюрлю спорт турнирде хорлагъанды. Мийик дараджада бардырылгъан спорт эришиулеге къошулуб, тёгерекге мамырлыкъ джая, алчы орунланы алгъанлай тургъанды. Алай бла, бизни джердешибиз, «Миллет тутушдан спортну устасы» деген сыйлы атха ие болгъанды.
Бийболатны Къарачай-Черкес Республиканы Халкъ Джыйылыууну (Парламентини) 7-чи чакъырыууна депутат этедиле. Ол, депутатлыкъ ишин бардыра, акъыл хазнасыны кючюн джамагъатха джая, анга салыннган депутат борчланы, халкъгъа хайыр келтирлик ишлени юлгюлю толтуруб, кёб адамдан разылыкъ табханды.
Орус улуну Регламентге, мандат ишлеге, кёбчюлюк информацияны мадарларына къарагъан комитетни тамадасы къуллукъгъа саладыла. Сынамлы, уста адам, джангы къуллугъуна толу берилиб, ишге таукел джюрюш алдырады. Законну, джорукъну бузгъанланы ишлерин сюзе, кемликлени къоратыр джанындан джумушла эте, кесини оюмларын Парламентге теджей, адамланы тарыгъыуларына къарай, хар зат белгиленнген джорукъну тамалында болуб турурча мадарла къурай, комитетни ишин тыйыншлы дараджада бардыргъанды.
Кърал, аны этген ашхы ишине, джумушуна сый бере, кёб тюрлю саугъа бла саугъалагъанды. Аланы арасында Эресей Федерацияны Федерал Джыйылыууну Кърал Думасыны аппаратыны Хурмет грамотасы, Къарачай-Черкес Республиканы Халкъ Джыйылыууну (Парламентини) Хурмет грамотасы, генерал-полковник С. К. Махамет улуну аты бла этилген, «За заслуги» деген медаль дагъыда башха саугъалары бардыла.
Ауушханды, Аллахны рахматында болсун. Аны адамлыгъы, ишленмеклиги, адеби, намысы уллу эди. Ол тюзлюкню тутхан, ёксюзню, къарыусузну джакълагъан, халкъын сюйген, багъалатхан, адамлагъа сый берген инсан эди.

Узеирланы Хусей.