КъЧР-де ишлемеген пенсионерлени компьютер бла хайырланыргъа хакъсыз юретирикдиле.
Ол джумушну тындырыргъа иш этиб курсла ачыллыкъдыла. Аны тышында да джамагъатны социал джаны бла баджаргъан организацияланы материал-техника базаларын игилендириуге эс бёлюннюкдю. Бу ишлени КъЧР-ни Урунуу бла социал ёсюмюню министерствосу эмда РФ-ны Пенсион фондуну Къарачай-Черкес управлениеси бу джылны ичинде тындырыргъа керекдиле.
Алайды да, КъЧР-ни Башчысы Темрезланы Рашидни аманаты бла «О социальной программе «Укрепление материально-технической базы организаций социального обслуживания населения и обучение компьютерной грамотности неработающих пенсионеров в Карачаево-Черкесской Республике в 2018 году» деб КъЧР-ни Правительствосуну бегими чыкъгъанды.

РФ-ны Пенсион фонду бла КъЧР-ни Правительствосуну арасында кесаматны проекти да джарашдырылгъанды. Анда сёз пенсионерлени компьютер джаны бла билимлерин ёсдюрюр, социал джумушланы баджаргъан организацияланы материал-техника базаларын игилендирир ючюн РФ-ны Пенсион фонду ачха бла болушлукъ этеригини юсюнден барады.
Бу тукъум болушлукъ къартлагъа, сакъатлагъа, интернатлада тургъанлагъа табдырылгъан джумушну асыулулугъун игилендирликди, пенсионерле компьютер бла хайырланыргъа тюзелселе, кеслерине керекли информацияны табаргъа юренникдиле.