Миллетибизни арасында тутхан ишлерин бет джарыкълы баджарыб, билимлери, усталыкълары бла башхалагъа юлгю болгъанла аз тюлдюле. Аллайланы бири эди электроэнергетика санагъатны алчы устасы, кърал къуллукъчу Темирджанланы Акъбузоуну джашы Нурбий да. Ол арабызда джашаса, быйыл анга 65 джыл толлукъ эди.

Аны тюз ишчиден Ростехнадзорну Шимал Кавказда регионла арасы управлениесини тамадасы къуллукъгъа дери ёсгени муратха джетиуню, урунуугъа сюймекликни юлгюсюдю.
Темирджанланы Нурбий 1960-чы джыл башил (январь) айны 12-де Ташкёпюр элде туугъанды. 1976-чы джыл эл школну тауусханды. Урунуу джолун 16 джылында Къарачай шахарда 2-чи номерли Джол-ремонт къурулуш управлениеде башлагъанды. 1977-чи джыл Темирджан улу Ставрополда технология институтну Къарачай-Черкесияда филиалыны энергетика факультетине киргенди. Бир джылдан аскер къуллукъгъа чакъырылгъанды. Аскерден келгенинден сора ол ВУЗ-да окъууун бардыргъанды. Темирджанланы Нурбий окъуй тургъанлай Черкесскеде педагогика колледжде лаборант болуб ишлегенди.
1986-чы джыл институтну айырмагъа бошаб, «Электроснабжение промышленных предприятий, городов и сельского хозяйства» деген усталыкъ алыб чыкъгъанды. 2008-чи джыл экинчи баш билим алгъанды – Пятигорскеде кърал технология институтну да айырмагъа бошаб, «Государственное и муниципальное управление» усталыкъ алгъанды.
1986-чы джыл Къарачай шахарда Инструментал заводну энергетика бёлюмюню устасы болуб ишлеб башлагъанды. Юч джылдан Темирджан улу заводну баш энергетиги болгъанды. Бу къуллукъда 8 джыл ишлегенди.
1994-чю – 1996-чы джыллада Темирджанланы Нурбий Къарачай-Черкес республикан энергонадзорну Къарачай районда инспектору болуб ишлегенди. 1996-чы – 1997-чи джыллада «Карачаево-Черкесскэнерго» компанияны къыбыла электросетлерини инспектору, 1997-чи – 1999-чу джыллада «Карачаево-Черкесск-
энерго» АО-ну испектору къуллукъланы толтургъанды. 1999-чу джыл энергонадзорну КъЧР-де бёлюмюню кърал инспектору къуллукъгъа кёчюрюлгенди. 2001-чи – 2004-чю джыллада «Кавказская энергетическая управляющая компания» организацияны директоруну сатыу джаны бла орунбасары, 2002-чи – 2003-чю джыллада уа «Карачаево-Черкесскэнерго» АО-ну сатыу джаны бла директору болуб ишлегенди. 2003-чю джыл Госэнергонадзорну Къарачай-Черкесияда управлениесини тамадасы къуллукъгъа салыннганды. Артда, 2005-чи – 2008-чи джыллада, Ростехнадзорну КъЧР-де управлениесини тамадасы къуллукъну толтургъанды. Къайда да Темирджан улу къуллукъ борчларын бет джарыкълы баджаргъанды, сыйгъа-махтаугъа тыйыншлы болгъанды.
2008-чи джыл Темирджанланы Нурбийге «РФ-ны 3-чю дараджалы кърал кенгешчиси» (генерал-майор) деген чын берилгенди. 2009-чу джыл ол Экология, технология эмда атом надзорну хакъындан федерал къуллукъну (Ростехнадзор) Шимал Кавказда управлениесини тамадасыны орунбасары къуллукъгъа салыннганды. 2011-чи джыл Темирджан улу Ростехнадзорну Шимал Кавказда регионла арасы управлениесини тамадасы къуллукъну толтуруб башлагъанды. Ол джыл огъуна анга «РФ-ны 2-чи дараджалы кърал кенгешчиси» (генерал-лейтенант) деген чын берилгенди.
Темирджанланы Нурбий 30 джылдан артыкъны Эресейни электроэнергетика санагъатында уруннганды. Ол ишин бет джарыкълы баджаргъан уста эди, билимли тамада эди. Аны усталыгъы ючюн, тюрлю-тюрлю джууаблы къуллукълагъа кёчюрюб баргъандыла.
Нурбий джашауну сюйген, сыйы-махтауу болгъан огъурлу адам эди. Ол кърал къуллукъгъа кертилигин танытханды, юйдегисине, джууукъгъа-тенгнге джюрек джылыуун бере билгенди. Ишлеген джеринде да аны сыйы уллу эди. КъЧР-ни эмда Ростехнадзорну башчылыкълары да Темирджан улуну ишине, адамлыкъ шартларына тыйыншлы багъа бергендиле.
Ишинде джетишимли болгъаныча, Нурбий ашхы юйдеги да ёсдюргенди. Ол юй бийчеси Светлана бла бирге эки къызны – Альбина бла Альмираны – джашауну тюз джолуна салгъанды. Экиси да, Къарачай шахарда школну айырмагъа бошаб, Ставрополда медицина институтда баш билим алгъандыла. Альбина Москвада, Альмира да Ставрополда усталыкълары бла ишлейдиле, экиси да тышына чыкъгъандыла, сабийле ёсдюредиле.
Тутхан ишин айыбсыз баджаргъаны ючюн, Темирджанланы Нурбийге кёб тюрлю кърал саугъа, махтау грамота берилгенди. Аланы арасында РФ-ны Энергетика министерствосуну «За усердие» медалы, «290 лет Ростехнадзору» деген юбилей медаль, КъЧР-ни Промышленность бла энергетика министерствосуну Хурмет грамотасы бардыла. Аны бла бирге Темирджан улу «РФ-ны сыйлы энергетиги» эмда «Ростехнадзорну сыйлы къуллукъчусу» деген атлагъа тыйыншлы болгъанды. 2013-чю джыл РФ-ны Президентини Указы бла «За заслуги перед Отечеством» деген орденни II-чи дараджалы медалы бла саугъаланнганды.
Аллай огъурлу, билимли, юлгюлю адамланы бири эди Темирджанланы Нурбий. Аны аты юйдегисини, джууукъларыны, тенглерини, биргесине ишлегенлени джюреклеринде джашайды.

КЪОЙЧУЛАНЫ Аскербий,
тарих илмуланы доктору, профессор.