Озгъан джыл «Россети Северный Кавказ – Карачаево-Черкесскэнерго» филиалны усталары джорукъ сакълагъан органла бла бирге электрокъууатны урлагъанланы ачыкълагъандыла. Джылны ичинде ала аллай беш заранлы ишни джолун кесгендиле.
Хакъын тёлемегенлей, электрокъууатны джашыртын кюйдюрюуге айтылады «урлагъан» деб. Аны лагъымы да белгилиди – «майнинговый ферма» деген устройстволаны хайырландырыу. 2025-чи джылны ичинде, тинте барыб, аллай 77 устройствону табхандыла. Аланы юслери бла 1,1 мелиуан киловатт-сагъат эркинликсиз кюйдюрюлгенди. Аллай бир киловатт, сёз ючюн, 25 минг чакълы адам джашагъан Уруп районнга бир ай джарымгъа джетерикди. Ачха бла тергегенде ол хыйла ишледен артха турмагъанла республикабызны электросеть комплексине 6,6 мелиуан сом багъасы заран тюшюргендиле. Ол халда криптовалюта алыу (урлау) бла байламлы былтыр беш заранлы ишни ючюсю Къобан районда, къалгъанлары Адыге-Хабль, Абаза, Гитче Къарачай районлада болгъандыла.
– Электрокъууатны юлешиучю сетледе ток къаллай бир кюйдюрюлгенин эсеблеб, анализ этиб, сетлеге мардадан артыкъ кюч джетгенин эслеб, адамланы тарыгъыулары да тынгылаб, криптофермаланы алай ачыкълагъанбыз. Аллай кемликлени, терк къымылдаб, къоратыр оноу этебиз, – деб хапар айтады «Карачаево-Черкесскэнерго» филиалны директору Гочияланы Марат.
Республиканы энергетиклери майнинг фермаланы юсю бла этилген заранлы ишлеге къаршчы кюрешиуню 2024-чю джылдан бери кючлю тукъум къолгъа алгъандыла. Андан бери электросеть компаниягъа джорукъ бузуучула 104,3 мелиуан сом багъасы заран салгъандыла.
«Россети Северный Кавказ» компанияны къуллукъчулары джорукъгъа сыйынмагъанланы кёз туурада тутадыла. «Токну урлаучула электрокомпанияны ишине чырмау болсала, кимден да бек электрокъууатны хайырландыргъан тюз джамагъат джарсыйды. Технология бузукъланы чуруму бла юйлеге, башха мекямлагъа от тюшерге да болады, алай эсе адамланы саулукъларына, джанларына да къоркъуу барды. Ол тукъум джорукъ бузуугъа къаршчы кърал джанындан этилген мадарланы эсигизге салыргъа излейбиз. Эресейни Правительствосу 2025-чи джылны башил (январь) айыны биринчи кюнюнден башлаб, 2031-чи джыл алтотур (март) айны 15-не дери майнингге эркинлик берилмеген регионланы тизимин бегитгенди. Ол тизимге Къарачай-Черкесия да тюшгенди.
Электрокъууатны законсуз хайырландыргъанланы кёрсегиз, «Россети» компанияны «терк болушлукъ» линиясына 8-800-220-0-220 (къысха номер 220) телефон номер бла билдиригиз, деб тилекчибиз. Ол къонгурау ючюн хакъ алынмайды, ким сёлешгени да кишиге билдирилмейди.
Алакъайланы Надежда,
«Россети Северный Кавказ» компанияны регионла бла ишлеген къуллугъуну баш устасы.
