Къарачай-Черкес Республикада «Капля крови – ради жизни» деген акция бардырылады. Ол донор къозгъалыуну ёсюмюне, къан керекли болгъанлагъа болушлукъгъа аталгъанды. Анга «Герои Карачаево-Черкесии» деген кадр программагъа къошулгъанла да джангыдан къатышхандыла.

Къарачай-Черкес Республиканы Башчысы Темрезланы Рашидни аманаты бла къуралгъанды «Герои Карачаево-Черкесии» деген программа. Ол СВО-да болгъан аскерчилерибизни джакъларгъа, ветеранланы профессионал ёсюмлерини дараджасын кёлтюрюрге джораланады. Анга къошулгъанла, джангы усталыкълагъа юреннгенден, стажировка этгенден сора да, социал тириликлерин таныта, аладан болушлукъ излегенлеге къайгъырадыла.
«Ала бу акциягъа озгъан джыл да къошулгъан эдиле. Быйыл да, ол сууаб, иги ишни джангыдан башлаб, республиканы больницаларына керекли донор къанны бередиле. Бу халда бардырылгъан огъур ишле адет болуб бошагъандыла. Ол зат, донор къанны кереклиси чакълы бир толтургъандан сора да, кеслери разылыкълары бла бу ишни этгенлени къайгъырыулулукъларын кёргюзеди. Адамланы арасында бирикмекликни, шохлукъну, бир-бирине болушууну кючюн бегитеди», – дейди «Герои Карачаево-Черкесии» программаны тамадасы Ёртенланы Азнаур.
Бу акциягъа, ауруб инджилгенлеге болушур муратда, регионну къайсы бир адамыны да къошулургъа эркинлиги барды. Республиканы къан къуйгъан станциясында, Черкесскеде Пушкин атлы орамны 67-чи номерли мекямында, къан берирге боллукъду.

Алчакъланы Хусей.