Кёб болмай ич ишлени Зеленчук район бёлюмюнде милицияны отставкадагъы майору Батчаланы Билялны джашы Мухатны 70-джыллыгъы бла къууанч халда алгъышлагъандыла.
Бюгюнлюкде Батча улу районда ич ишлени джамагъат советини эмда ветеранларыны советини тамадасыды. Ол кесини бютеу джашауун мизамны-джорукъну сакълаугъа бергенди, ёсюб келген джаш тёлюню ариу халда ёсдюрюр ючюн, кёб къыйын салгъанды. Энтда да районда джашагъан адамланы тынчлыкълары бузулмаз ючюн, джаш адамла тюз джолда барыр ючюн, бютеу кючюнкъарыуун эмда билимин салыб кюрешеди.
Ич ишлени министерствосуну Зеленчук район бёлюмюню тамадасы Евгений Ковалев Мухатха уллу сый бериб сёлешгенди. Ветеранлагъа тыйыншлы къайгъырыу танытханын, аланы бирикдирир, бай сынамларын хайырландырыр ючюн, кёб иш этгенин да чертгенди.
Бюгюнлюкде ол ич органлада ишлеген джаш адамладан билген билимин къызгъанмайды, алада Ата джуртха сюймекликни, патриот сезимлени къозгъай биледи, кеслеринден уллуланы сыйларгъа юретеди.
Мухат Биляловични туугъан кюню бла алгъышларгъа келгенлени ичлеринде ич ишлени Зеленчук район бёлюмюню къуллукъчулары, ветеранла, Къарачай-Черкесияны Ич ишлерини министерствосуну ветеранларыны советини башчылыкъ этген къаууму, Зеленчук муниципал районну башчысы Ижаланы Хусей, районда социал политикадан, саулукъ сакълаудан, илмудан, окъуу-билим бериуден, маданият бла спортдан комиссияны тамадасы Чауушланы Ислам, Зеленчук муниципал районну къазакъларыны атаманы Виктор Миронычев, районда маданият бёлюмню тамадасы Владимир Карпинцов дагъыда башхала бар эдиле.
Ала, барысы да сёз алыб, Батча улуну уллу адамлыгъын, ишленмеклигин, джамагъат джашаугъа тири къошулгъанын чертдиле. Аны джашауу, иши да джаш адамлагъа юлгю болгъанын да айтдыла.
Батча улугъа ол кюн кёб иги алгъыш этилди, кёб саугъа да берилди.
Мухат Билялович «Къарачай» газетни эртдеден бери да иги шохларыны бириди. Ич ишлени ветеранлары бла байламлы мероприятиеледен, джаш тёлю бла бардырылгъан тюбешиуледен хапар билдиргенлей турады. Айтыргъа, иги билген, таныгъан адамыбызды. Биз да анга кийик саулукъ, узакъ ёмюр, насыб теджейбиз. Этген ашхы муратларынг толсунла, мындан ары да миллетинге, джуртунга да къуллукъ этерге къолунгдан келсин, узакъ къартлыкъгъа дери джаша, дейбиз.
Мамчуланы Дина.
