Быйыл 50-ден аслам терен билимли уста элледе ишлеб тебрерикдиле – ала «земский» дохтурла, устазла, маданият къуллукъчула эмда тренерледиле. Аны хакъындан КъЧР-ни Башчысы Темрезланы Рашид кесини соцсетлеринде джазгъанды.

2026-чы джыл, планда белгиленнгенине кёре, «земский» программа бла эллеге 11 устаз, 18 маданият къуллукъчу, 19 дохтур эмда 5 спорт уста ашырыллыкъды.
– «Земский маданият къуллукъчу» бла байламлы программа КъЧР-де былтырдан бери ишлеб тебрегенди. «Земский тренерле» программа бизни регионда джашаугъа быйыл сингдирилиб тебрегенди.
Ол зат, сёзсюз да, элчи джаш тёлюню спортха алландырыргъа уллу себеблик этерикди.
«Земский» программа ишлеб башлагъанлы эллеге кёб билимли усталаны ашыргъанбыз. Айтыргъа, республиканы эллеринде 61 устаз, 200-ге джууукъ врач, 4 маданият къуллукъчу урунуб тебрегендиле, – деб джазгъанды Темрез улу.
Сёзсюз да, элчилени джашауларына билимли устала кёб магъаналы эмда сейир зат киргизирге боллукъдула. Ол а шахарла бла эллени араларында айрылыкъны къысхартыргъа юлюш къошарыкъды.