Къарачай-Черкесияны музейлери быйыл джангы техника оборудование бла баджарыллыкъдыла. Ол затха «Юйдеги» миллет проектни «Юйдегиге джораланнган маданият» деген федерал проекти джол бергенди.

Алайды да, Тебердиде туризмни тарихи бла альпинизмни музейине, Байчораланы Мариям атлы республикан тарих-маданият эмда табигъат музейге-заповедникге, Ючкекенде «Рум-Къала» музей аралыкъгъа заманны излемине келишген оборудование тюшерикди.
Сёз ючюн, Тебердиде музейге экспонатланы тёрт джанларын да кёрюрге мадар берген мияла витрина салынныкъды. Суратланы тагъаргъа джараулу джангы галерея системала джарашдырыллыкъдыла, музей фондланы сакъларгъа шкафла берилликдиле.
Аны кибик, музейге ишни игилендирирге болушурукъ кёб тюрлю зат саугъа этилликди, юйню ичинде бардырылгъан ишни тышындагъыла билирча, айтылгъанны арбаздагъыла да эшитирча комплектле салынныкъдыла. Анда ишлеген адамлагъа да ашхы урунуу болумла къураллыкъдыла.
Иги тюрлениуле «Рум-Къала» краевед музей аралыкъда да боллукъдула. Аны экспозициясына профессионал витрина къошуллукъду, стеллажла эмда кёрмюч ишлеге багъышланнган оборудование тюшерикди.
Алай бла, джангыргъан музейле келген къонакълагъа джарыкъ тюберге ашыгъырча боллукъдула.