Черкесск шахарда сабий поликлиника эшиклерин ачаргъа хазырланады. Бу кюнледе республиканы ара шахарыны мэри Алексей Баскаев бла КъЧР-ни саулукъ сакълау министри Динара Камурзаева тамамлы ремонт этиле тургъан поликлиниканы не болумда болгъанына къарагъандыла.

– Бу бизни регионда эм иги сабий медицина учреждениелени бириди, – дегенди Алексей Баскаев. – Анда бир кюннге 250 сабийге къараргъа боллукъду. Медицина учреждение бютеу стандартлагъа эмда излемлеге тыйыншлы келишеди. Кёб турмай аны неси да заманны излемине кёре джарашдырыллыкъды, ол джангы оборудование бла толу баджарыллыкъды.
Поликлиниканы айбат эмда джарыкъ тюрсюн алгъан мекямында отдан сакълагъан сигнализациясы, видеонаблюдениеси толусу бла джангыргъандыла. Сабийлери бла келген аталагъа-аналагъа къыйналмай джюрюрча таблыкъла къуралгъандыла, сакъат сабийлеге джол тынч болгъанды, сабийле ойнарча джерле ишленнгендиле, кёзюулерин сакълагъанлагъа таб шиндикле салыннгандыла, джангы лифт ишлерикди. Мебель бла оборудованиени келтириб тебрегендиле.
– Энди бери келгенлени кёзлерине эм алгъа эшикни башында джангы джазыу (вывеска) илинникди. Аны къаллай боллугъуну оноуу этиле турады. Ишден хапарлы адамла аны келишдирликлерине эмда мекямны ичин да анга кёре джарашдырлыкъларына ишек да джокъду, – деб къошханды шахарны мэри.
Планда белгиленнгенине кёре, республикан сабий поликлиника байрым (февраль) айны аягъына хазыр боллукъду.