Башил (январь) айны 21-де Къарачай-Черкесияны Премьер-министри Мурат Аргунов бла республиканы сабий омбудсмени Алакъайланы Мария тюбешиб, сабийликни джакълауну хакъындан джарсыуланы сюзгендиле.

Алакъайланы Мария ол джаны бла, регионну Правительствосу кёлтюргючлюк этсе, таб баджарыргъа боллукъ ишлени юслеринден айтханды.
Тюбешиуде сёз республиканы социал учреждениелери бла иш джюрютюуню, ёксюзлени эмда аталары-аналары тыйыншлысыча къарамагъан сабийлени джашауларын игилендириуню, аланы саулукъларын тюзетиуню, билимлерин ёсдюрюуню юсюнден баргъанды.
Мурат Аргунов бла Алакъайланы Мария къыйын болумда джашагъан сабийлени саулукъларына къаратыугъа, алагъа социал реабилитация этдириуге аталгъан ишлеге айырыб эс бёлгендиле.
Тюбешиуню ахырында республиканы Правительствосуну Председатели Мурат Аргунов арада байламлылыкъны бегитиб, бирге кенгешле бардырыб, сабийлени джакълау бла байламлы къаллай джарсыу болса да, анга терк къараргъа кереклисин чертгенди.