Биз керти да тамаша джерледе джашайбыз. Анга шагъатлыкъ этеди джылдан джылгъа бизни джуртлагъа келиб солургъа излегенлени саны кёбден кёб бола, туризм тири джюрюш ала баргъаны.

Тёгерекни ариулугъундан тышында да, гара сууларыбыз, таза хауабыз, дарман хансларыбыз… Не джаны бла да бузулмай тургъан табигъатыбыз…
Ма аны ючюн, джер-суу кёре бу джуртлагъа келирге кёбле излейдиле. Уллу къралыбызны джети этегинден келгенден тышында да, тыш къралладан да тараладыла бизни джуртларыбызгъа. Анга шагъатлыкъ этеди «Къарачай» газетни почтасына бу кюнледе келген письмо. Анда былай джазылады:
«Мен Сурцириядан ретороманецме. Атым Витусду. Къарачай-Черкесияны бир да бек джаратама. Бу тамаша джуртдан хапарлы болурум келеди. Сизни бу сейирлик къралыгъыздан
тенглерим болса бек излей эдим, письмо джюрютюрча. Ол себебден, мени суратымы да салыб, адресими да бир берсегиз газетде, бек разы боллукъ эдим. Vitus Castelberg Aspermont Str.19 Ch-700 Chur Switzerland. Бек сау болугъуз, сизге хурмет эте, Витус».
Ма быллай письмола бизни керти да сейир джуртларыбыз болгъанына шагъатлыкъ этедиле. Джерибизни-сууубузну, таза табигъатыбызны, тамаша джуртубузну кёбле джаратадыла. Аны ючюндю туризмни айный баргъаны, туристлени кёб бола баргъаны.