Джангы джыл джууукълашыб келеди. Ол Къызыл (От бетли) Атны джылыды. Шаркъ орузлама бла джылны белгиси 2026-чы джыл байрым (февраль) айны 17-де кючюне кирликди.
Григориан орузлама бла Джангы джылны белгилеуде къралланы асламысында къаллай джорукъла болгъанындан эмда бир талай белгини юсюнден айтайыкъ.
Джылны белгисини юсюнден
Ат эркинликни эмда джашауну сюйген, учунуб къымылдагъан, аны бла бирге адам къолгъа юреннген джанды. Атны уллу тёзюмлюлюгю, кючю барды, ол бек ышаннгылыды. Ат джылда туугъанла кеслерини орунларын биледиле, шохлукъну, джууукъгъа-тенгнге сый бериуню багъалатадыла, кертиликлери бла да белгилидиле, деген айтыу барды. Ат не заманда да болушлукъ этерге хазырды.
Ат орнундан тебмегенни сюймейди, ол къачан да алгъа барыргъа, джашаугъа къууаныргъа излейди.
2026-чы джылны белгиси от бетлиди. Аны амалтын ол джылытыргъа, кюйдюрюрге да боллукъду. Алай бла, къоркъуусузлукъну унутмазгъа тыйыншлыды.
Ат сёзню-къайгъыны, хыйла ишлени сюймейди. Ол ачыкъ кёллю джанды.
Джангы джылны белгилеу
Ат кёбчюлюкню джаратады, анда-санда бири болмаса, джангызлыкъны сюйген джокъду. Аны себебли, кёб адам бирге джыйылыб, байрамны алай белгилейдиле. Джангы джылгъа таза хауада, отну тёгерегине джыйылыб, тюберге сюйгенле да кёбдюле.
Кийим сайлау
Джылны белгиси ариулукъну, айбатлыкъны сюеди, ол кёзге тюшерге сюеди. Къалгъанладан да аны излейди. Башха джылладача болмай, быйыл байрамгъа миллет кийимледе тюберге излегенле кёбдюле. Ол байрам кюн бек ариу кёрюннюкдю.
Ингирги моданы сюйгенле катапа, чилле дегенча багъалы къумачлагъа эс бёледиле. Аллай къумачладан этилген кийимле тюрлю-тюрлю бояулула болургъа боллукъдула – къызгъылдым-сары, къызыл, кимит бетли, джашил.
Эркишиле къараууз кюл бетли кийимле, кёк эмда мор костюмланы сайларгъа боллукъдула.
Юйню джасау
Быйыл юйюню джасагъан сагъатда миллет затлагъа (этностиль) эс бёллюкдюле. Сёз ючюн, Эресейни, Шаркъны, Африканы дагъыда башхаланы адетлерин хайырландырыргъа боллукъдула.
Къралыбызны затларын джаратханла юйюгюзню лён, мамукъ къумачла бла джасаргъа неда миллетибизде джюрюген затланы (оюнчакъланы, агъачдан, къумачдан дагъыда башхаладан этилген затланы) хайырландырыргъа боллукъсуз. Нызы, нарат тереклени джасагъанла да кёбдюле.
Тепси
Къууанч тепси байрамны баш белгисиди. Тепсиге акъ, къызыл, джашил, алтын бетли джабыу бла къол сюртюучюле салынса, ариу джарашырыкъды.
Джангы джылгъы тепси да миллет хантла бла джасалса тыйыншлыды. Тепсиге аслам салыныучу кёгетле: мандарин, апельсин, гранат, джюзюм, хурма, инжир, алма, кертме.
Къызыл Ат асыулулукъну, тазалыкъны, кертиликни сюйгени себебли, Джангы джылгъа ушхууур этген заманда ол затха эс бёледиле. Сёз ючюн, тахта кёгетледен салатла, тауукъ, къырым тауукъ, чабакъ этледен тюрлю-тюрлю ушхууурла этерикдиле. Ат шекерни сюйгени ючюн, тепсиге татлы затла салыргъа да болады.
Джангы джылгъа саугъала
Ат тынгысыз джан болгъаны амалтын, бир-биригизге алгъа барыу, джюрюу, къымылдау дегенча затла бла байламлы саугъала берирге боллукъсуз – фитнесге абонементле, спорт эмда джарыкълыкъ ишлеге сертификатла дагъыда ала кибик башха затла.
Джууукъларыгъызны арасында джырны, тепсеуню сюйгенле бар эселе, аланы концертге билетле бла саугъаларгъа да боллукъсуз.
Ат кючлю болгъаны бла бирге, акъыллы джанды. Аны себебли
«акъыллы» саугъаланы – китабланы, электрон китабланы, билимни ёсдюрген башха затланы – унутмагъыз.
Джангы джылдан не сакъларгъа боллукъду?
2026-чы джыл ишигизде ашхы тюрлениулени кёрюрге, этген муратларыгъызгъа джетерге боллукъсуз. Къыйын эмда джууаблы ишлени къолгъа алыргъа къоркъмагъыз, джетишимли болмай къаллыкъ тюлсюз, Аллах буюрса.
Ат джыл сабий туууугъа да ашхы кёзюудю. Ол джыл туугъан сабийле, асламысына, адеблиликлери, кючлюлюклери, ариу халилери, саулукълары бла белгилидиле.
2026-чы джылны ышанлары
Эм алгъа байрамны аллы бла алгъыннгы джумушларыгъызны тындырыгъыз, ат артыкъ джюкню сюймейди. Ызы бла юйюгюзню таза этигиз.
Джангы джылгъы байрам башланнгынчы эрлай тепси джанына олтурургъа неда телефонну къолгъа
алыргъа чабмагъыз. Андан магъаналы ишле да бардыла. Джууукъларыгъызны къучакълагъыз, бир-биринге алгъыш айтыгъыз.
Огъур бла келсин Джангы 2026-чы джыл!
Басмагъа САЛПАГЪАРЛАНЫ Умар хазырлагъанды.
