Адамгъа ненча джыл болгъанын бетине къарасанг танылыб къалады кёбюсюне. Мен хапар айтырыкъ устазны бетинден, кесин тутханындан а билеллик тюлсе аны джылын. Бир къарасанг, сабийле бла мектебни арбазында гюллени сала турур, бир къарасанг, тобну ызындан чабар, бир классында сохталагъа математиканы ангылата турур…

Адамны джюрегинде ненча джыл бар эсе, анча джыл болады, кертиси да алай болурму? Лаура Хасановнада алайды.
Ол Къоркъмазланы Хасан бла Боташланы Шамшиятны юйдегилеринде биринчи сабий болгъанды. Атасы устаз болгъаны, гитчелерине къараргъа анасына болушханы себебли болур, эртдеден огъуна джууаблылыкъ къызчыкъны биринчи шарты болады.
Къойдан элде мектебге барады, сегиз классны бошагъанында, Николаевка элде тогъузунчу, онунчу класслада окъуйду. Немча тилни биринчи дерсден башлаб джюреги алады. Башха дерслени да сюеди: орус тилни, математиканы, географияны, тарихден дерслени. Школну бошаргъа ангысын тыш къралны тиллеринден билим берген институтха бурады. Пятигорскеде институтха киреди. Аны джетишимли бошаб чыгъады.
Андан бери элли джылдан артыкъ ётеди. Ол кёб заманды. Лаура Хасановна билимин, чемерлигин бек терен этгенди. Не келсин, немча тилден устаз сюйген усталыгъы бла ишлер мадары джокъду. Энди ол тил ана тиллери болгъанла бла байламлылыкъ джюрютеди.
Кёб джылны «КИД» кружокну бардырыб, къралыбызда, тыш къраллада сохталарыны тенглери бла джазма джюрютюб тургъанды, «Молодая гвардия» къауумдан сау къалгъанла бла, ёлгенлени адамлары бла байламлыкълары болгъанлай тургъанды. Джанын-къанын аямай, сохталарын кесини юч джашындан, туудукъларындан башха кёрмей ишлейди. Къайсы дерсни окъутмагъанды озгъан джыллада: немча тил, география, технология… Неден берсе да, терен билим бериб, адамлыкъны, намысны, миллетлерине, туугъан джерлерине сюймеклик сезимлени, башха иги шартланы сингдире, сабийлени, аланы аталарыны-аналарыны разылыкъларын табханлай турады. Устазлыкъ джумушларын джюреги бла этеди, аны ючюн, линейка боламыды, ачыкъ дерс боламыды, классдан тышында иш боламыды – барысы да аламат ётедиле.
Лаура Хасановна къайда болса да, окъутхан сабийлери кёрселе, къууанадыла, бир байрамны сансыз этиб къоймайдыла: джазадыла, къонгурау атыб, алгъышлайдыла, саугъала этедиле.
Лаура Хасановнаны тюрлю-тюрлю джерледен талай махтау къагъыты барды. Кёб болмай а «Эресейни окъуууну сыйлы къуллукъчусу» деген атха ие болгъанды. Бу къаджыкъмагъан устаз андан уллу дараджагъа да тыйыншлыды, алгъан да этерикди ол дараджаланы, Аллах айтса, нек десегиз, сабийлеге сюймеклиги аны джашлай тутады, учундурады.
Сабийлени, уллуланы да келе тургъан джангы джыл бла алгъышлай, саулукъ, насыб, джангы джетишимле теджейди устаз. Биз да саугъасы бла алгъышлай, кюч-къарыу, саулукъ теджейбиз Лаура Хасановнагъа.

Эдиланы Надиахан.