Къарачай-Черкесияда «Зов Родины» деген къауумну келечилери аскерчилерибизни кёллерин кёлтюрюр муратда алагъа Джангы джылгъа гуманитар джюк джибергендиле.

«Аскер къаугъа баргъан джерде къуллукъ этген аскерчилерибизге Джангы джылгъа саугъала ашыргъанбыз. Алай бла, ала юйдеги джылыуну сезерикдиле, къууанч сезимлеге бёленникдиле. Сабийле джазгъан письмоланы окъусала да, аскерчилени кёллери джарыкъ боллукъду. Джангы джыл эм джарыкъ байрамланы бириди, хар ким да ашхылыкъла сакълайды. Алай бла, хар джыл сайын аскерчилени къууандырыргъа кюрешебиз», – деб хапар айтханды «Зов Родины» деген къауумну волонтёру Салпагъарланы Альбина.
Алайды да, аскерчилеге Джангы джылгъа татлы затла, какао, чай, кофе, шекер, бал, къозла, хычынла, къакъ эт, сют продукция, джылы чындайла дагъыда башха керекли затла ашырылгъандыла. Быйыл «Зов Родины» деген къауумну волонтёрлары кеслери парча хызенчикле тигиб, гуманитар джюкню алагъа салыб, алай ашыргъандыла.
Гуманитар джюкню джыйыугъа къуру бизни республиканы джамагъаты тюл, хоншу регионлада джашагъанла да къошулгъанларын айтыргъа тыйыншлыды.