Эндреуюк айны 19-чу кюнюнде республиканы Сабийлеге къошакъ билим берген аралыгъында (ЦДОД) «Бизни Къарачай-Черкес Республикабыз – кенг джюрекли Ата джурт» деген конкурсну тамамлагъан джыйылыу болду.
Ол магъаналы джумушха экиджюзден аслам адам келген эди: джаш тинтиучюле, аланы устазлары, ата-аналары эмда чакъырылгъан къонакъла. Къарачай-Черкес Республиканы окъуу бла илмуну хакъындан министри Инна Кравченко, Къарачай-Черкес Республиканы туризм бла курортланы хакъындан министрни орунбасары Александр Охрименко, Къарачай-Черкес Республиканы джаш тёлю ишлерини министрини орунбасары Расул Чуков, проектге джууаблы, Къарачай-Черкес Республиканы окъуу бла илмуну хакъындан министрини орунбасары Атайланы Лейла да алайда эдиле.
Энчи разылыкъ Сабийлеге къошакъ билим берген аралыкъны къуллукъчуларына, ишни аламат къурагъанлары эмда бардыргъанлары ючюн: аралыкъны тамадасы Джанкёзланы Хамидни къызы Земфирагъа, аралыкъны Сабий-джаш тёлю туризмни эмда туугъан джеринги тинтиу бёлюмюню тамадасы Байрамкъулланы Хусейни къызы Розагъа, аралыкъны тамадасыны орунбасары Зайцева Наталья Викторовнагъа.
Конкурсда хорламлы болгъанлагъа Къарачай-Черкес Республиканы Правительствосуну Махтау къагъытлары эмда джангы джылгъа аталгъан саугъала берилдиле. Ёсюб келген джаш тёлюге этген ишлерине аллай уллу сый берилгени джангы джетишимлеге учундурурчады. Алай а джыйылгъанлагъа эм баш саугъа Къарачай-Черкес Республиканы окъуу бла илмуну хакъындан министри Инна Кравченкону джюреклеге асыу болгъан сёзлери болдула.
«Мен бюгюн сыйыннгысыз ёхтемлендим, нек десегиз, кертиси да, бизни Къарачай-Черкес Республикабыз кенг джюрекли джурт болгъанын патауаладыгъыз. Мектеб къабыргъаланы ичи болуб къалмай, ол табигъатны юсю бла, ата-бабаларыбызны тили бла, аланы хунерликлери бла, байрамлары бла белгиленнген джолду деб бегитдигиз. Билим, къуру окъуу китабладан сора да, джашауну сейирлиги бла келгенин кёргюздюгюз. Уллу бюсюреу-сыпас ма бу джаш тёлюге, хар ким да сукъланырча кёргюзгенлери ючюн туугъан джерлерин, Ата джуртларын», – деди ол.
Проект сабийлени джерден, суудан, табигъатдан, тарихден, этнографиядан билимлерин ёсдюрюрге, Ата джуртха сюймекликлерин бегитирге, хоншулукъда, мамырлыкъда джашаргъа юретгенден сора да регионну айнытыугъа себеб боллукъду.
Ижаланы Фатима.
