«Муратланы нызысы» акцияны тамалында социал учреждениелени сабийлерине КъЧР-ни Башчысыны саугъалары берилгендиле. Аны кибик ала Къарачай-Черкесияны Правительствосуну членлеринден, КъЧР-ни Башчысы бла Правительствосуну Администрациясындан да алгъандыла саугъала.

Бу сууаблыкъ ишге КъЧР-ни Парламентини депутатлары, федерал структураланы джергили бёлюмлерини тамадалары да къошулгъанларын чертерге тыйыншлыды.
Юлюш алгъанланы ичлеринде интернат школланы, сабий юйлени, социал-реабилитацион аралыкъланы келечилери бардыла. Онюч джыл болгъан Ёзденбий суратлары болгъан 3D китабны алыргъа излегенди. Аны ол мураты бла «Муратланы нызысында» КъЧР-ни Башчысы шагъырей болгъанды. Джашчыкъгъа китабны табдыргъандыла. Тогъузджыллыкъ Ирина бла Къаплан да алгъандыла китаб саугъаларын.
«Сабий джюрекле насыбха бёленсинле. Муратлары толгъан сабийле Джангы джылгъа къууаныб тюберикдиле, алагъа адамла къайгъыргъанларын, аланы джашауларын джарыкъ этерге тырмашханларын ангыларыкъдыла. «Муратланы нызысы» къралда, бизни республикада да таукел атлайды», – деб джазгъанды Къарачай-Черкесияны Башчысы Темрезланы Рашид соцсетледе.

(Бизни корр.).