2025-чи джыл бизден айырылады. Бизни республикада джылны ичинде айырылыб уллу джетишимлеге ие болгъан адамла аны, сёзсюз да, багъалатыб эслеринде тутарыкъдыла. Аланы араларында къарачай миллетни келечилери да кеслерине тыйыншлы орун алгъандыла.
Айтыргъа, хар байрамны аллы бла Къарачай-Черкес Республиканы Башчысы Темрезланы Рашид урунууда, спортда эмда джамагъат-политика ишледе уллу джетишимлеге ие болгъанланы кърал эмда республикан дараджада саугъалагъанлай тургъанды. Айхай да, ол зат адамланы джангы хорламлагъа учундургъан бла бирге башхалагъа да ашхы юлгюдю.
Эресейни кюнюню аллы бла бизни джердешибиз Знаменка элни гимназиясыны директору Каппушланы Сейитбий «Эресей Федерацияны халкъ устазы» деген сыйлы атны алгъанды. Джёгетей Аягъы шахарда 5-чи номерли орта школну математикадан устазы Эриккенланы Халимат «Эресей Федерацияны махтаулу устазы» деген атха ие болгъанды. «Олимпик» республикан спорт школну директору Бостанланы Аслан «Эресей Федерацияны физкультурасыны махтаулу къуллукъчусу» деген атха тыйыншлы болгъанды.
Къарачай-Черкесияны Башчысы регионну эм уллу саугъасы «Къарачай-Черкес Республиканы аллында махтаулу ишлери ючюн» деген орден бла пенсионерни, урунууну ветераны Къарабашланы Казимни саугъалагъанды.
Къарачай-Черкесияны кюнюнде эмда Черкесск шахарны 200-джыллыкъ къууанчында ветеранланы Зеленчук район организациясыны тамадасы Орусланы Магометни джашы Назбий «Ата джуртну аллында махтаулу ишлери ючюн» деген II-чи дараджалы орденнге ие болгъанды.
Эресей Федерацияны Конституциясыны кюнюнде да талай адамгъа уллу саугъала берилгендиле. Къарачай-Черкес Сайлау комиссиясыны информацион аралыгъыны баш кенгешчиси Бадахланы Рустам
«Эресей Федерацияны сайлау системасыны махтаулу къуллукъчусу» атха ие болгъанды. КъЧР-ни Халкъ Джыйылыууну (Парламентини) Саулукъ сакълау комитетини тамадасы, «Къарачай – алан халкъ» джамагъат бирлешликни башчысы Хубийланы Хасан, КъЧР-ни халкъ джазыучусу Тотуркъулланы Къазий-Магомед «Къарачай-Черкесияны аллында махтаулу ишлери ючюн» деген орден бла саугъаланнгандыла.
Федерация Советни Къарачай-Черкесиядан сенатору Салпагъарланы Анзорну джашы Ахмат Шохлукъну орденине ие болгъанды. Ахматны къралны парламентаризмине къошхан уллу къыйынын эсге алыб, Эресей Федерацияны Президенти Владимир Путинни Указы бла берилгенди сыйлы джердешибизге бу уллу кърал саугъа.
Гитче Къарачай районну Джагъа элинде джашагъан Къоркъмазланы Кулизаргъа, Исмаилны къызына, РФ-ны Президенти Владимир Путин «Джигит ана» деген атны бергенди. Ол 14 сабийни анасыды. Бюгюнлюкде аны 13 туудугъу да барды.
«Архыз 24» телеканалны баш редактору Батчаланы Мадина Эресейни Президенти Владимир Путинни Бюсюреуюне тыйыншлы болгъанды.
Бу адамланы барысына эмда башха джердешлерибизге да Джангы 2026-чы джылда уллу джетишимле, насыб, саулукъ теджейбиз.
Мамчуланы Дина.
