«Бютеу джамагъатны джууукълашыб келген Джангы 2026-чы джыл бла алгъышлайма! Джердешлерими хар бирине да саулукъ-эсенлик, юйдеги насыб, джюрек рахатлыкъ теджейме!

Айырыб аскер къаугъагъа къошулгъан нёгерлериме, аланы аталарына-аналарына алгъыш этерге излейме. Алай айыргъаныма айыб этмегиз, аскер къаугъагъа къошулгъанланы адамлары тынгысыз кечеле, къайгъырыулу кюнле ашыргъанларын барыгъыз да ариу билесиз. Аллах бизни ол къайгъыларыбызны къысха заманда чачсын, Эресейни аскери хорламлы болуб, джигитлерибиз бары да юйлерине чырмаусуз-чарпыусуз къайтсынла, хар арбазда да къурманлыкъ чоюнла къайнасынла. Ол заманда джамагъат да чууакъ кёкню тюбюнде рахат джашар деб, келеди кёлюме», – дейди СВО-ну ветераны Биджиланы Алисолтанны джашы Асхат.
Хорламны джууукълашдырыр, рахатлыгъыбызны сакълар ючюн а, Биджи улу кеси бир да уллу юлюш къошханды. Ол бютеу джашауун Ата джуртха хакъ къуллукъ этиуге атагъанды.
Асхат 20 джыл чакълы бирни джорукъ сакълагъан органлада махтаулу къуллукъ этгенди. Заманы джетиб, ол тыйыншлы солуугъа чыгъыб тургъан кёзюуде аскер къаугъа башланнганды. Биджи улу кеси разылыгъы бла алчыланы тизиминде анга къошулгъанды. Аскер борчларын толтургъан заманда ётгюрлюк танытханлай тургъанды. Не къыйын болумда да алгъа таукел баргъан, джуртубуз ючюн отха-суугъа да кирген, уллу джигитликле этген джердешибизни Ётгюрлюкню ордени бла, Жуковну эмда «За боевые отличия», «За участие в СВО» дагъыда башха медалла бла саугъалагъандыла. Биджи улу урушланы биринде ауур джаралы болгъаны амалтын бусагъатда юйюнде турса да, эси фронтдады. Ол аскер нёгерлерине къайгъыргъанлай, Хорлам бизники боллугъуна ышаннганлай, джаш тёлюню патриот ангысын бегитиуге аталгъан ишлеге къошулгъанлай турады.