Республиканы Багъыу-реабилитацион аралыгъыны баш врачы Темрезланы Бориспийни таб башчылыкъ этиую бла мында кёб тюрлю иш къуралыб, тыйыншлы дараджада бардырылады. СВО-ну ветеранларына реабилитация этиледи.

Джюрек, сингир, сюек, башха системалагъа къаралады. Баш врачны терен къайгъырыуундан, бу аралыкъ 2022-чи джыл саулукъну бегитирге джораланнган федерал проектге киргенди. Аралыкъ аны тамалында джангы медицина керекле бла баджарылгъанды. Ала сыннганы, чыкъгъаны, ампутация этилгени, аны кибик башха джарсыулары болгъан адамлагъа болушадыла. Аны тышында криотерапия этиледи. СВО-ну ветеранларына деб ишленнген джангы корпус хайырланыугъа берилгенди.
КъЧР-де Багъыу-реабилитацион аралыкъны баш врачы, Темрезланы Солтан-Хамидни джашы Бориспий, миллетибизни Джангы джыл бла алгъышлай, эм биринчи саулукъ теджейди:
«Багъалы джердешлерим!
Сизни Джангы джыл бла алгъышлайма. Уллу Аллах джангы джылда хар инсанны джюрегине, джанына, юйюне, юйдегисине кёб насыб, къууанч берсин. Хар адамны тюз джол бла элтиб, ашхы муратларын толтуруб, зауукълугъун эркин, ёмюрюн узакъ этсин. Барыгъызгъа да кесигиз сакъламагъан игиликле берсин. Кёзле джарыкъ кёрсюнле, джюрекле нюрден толсунла. Хар адам юйдегисинден, джашауундан къууансын.
Ёсюб келген сабийле фахмулу, билимли, къайгъырыулу адамла болуб, адабиятха, маданиятха, тарихге, санатха, спортха, халкъны адебин, намысын, ашхы адетлерин сакъларгъа терен эс ийиб, Джуртха кертилик таныта, атларын, сый бла, махтау бла айтдырсынла. Халкъда чомарт джюрекли, джигит адамларыбыз кёб болсунла.
Уллу Аллах Къарачайгъа, республиканы бютеу халкъларына къууанч, насыб, рахат, мелхум джашау буюрсун. Келир Джангы джылгъа да ашхы мийик джетишимле бла джетдирсин, деб тилейме. Саулукълу болугъуз!»