Ётгюр къарачай миллетим!
Уллу Аллахдан Джангы джылда барыбызгъада кёб ашхылыкъла тилейме.

Миллетими джангы джетишимлери кёбден кёб, саулугъу кючлю болсун, этген иги муратлары толсунла. Хар заманда, мийик джетишимлени къатлаб, джашнаб тургъан кючюбюз толуб турсун!
Бир Аллах бизге кёб къууанч, насыб, тынчлыкъ, рахатлыкъ берсин, мелхум джашау буюрсун. Биригиб, джууукъгъа, тенгнге болушуб, кёб джылланы джашайыкъ. Арабызда хар заманда ашхылыкъ, игилик орун алгъанлай турсун.
Джаш тёлюбюз халкъыбызны адебин, намысын тутуб, ашхы адетлерини тёрюнде джашаб, кеслерине, башхалагъа да игилик этиб, тюз джолда алгъа учунуб, джигерлик, джигитлик, патриотлукъ, джуртха кертилик танытыб джашасын.
Мен республикабызгъа, къралыбызгъа, бютеу иги адамлагъа, уллу
къууанч, насыб, берекет, рахат, мелхум джашау теджейме.

Катчиланы Ахмат,
СССР-ни Министрлерини Советини саугъасыны лауреаты, РФ-ны махтаулу къурулушчусу.

Багъалы миллетим, туугъан элими сыйлы джамагъаты!
Сизни барыгъызны да бу келе тургъан
2026-чы Джангы джыл бла таза джюрекден алгъышлайма.
Кетиб баргъан 2025-чи джыл къуру бизни тюл, бютеу къралыбызны ичинде кёб джарсыуланы, къыйынлашыуланы туудурса да, анга да къаршчы туруб, бир-бирибизге билек бола, Уллу Аллахны болушлугъундан, Джангы джылгъа хайт деген джетишимле бла тюбейбиз. Джангы джылда унутулмазлыкъ, ёмюрлеге эсде сакъланныкъ ашхылыкъла, игиликле келсинле. Джашауубуз мамырлы болсун, аурууубуз сабыр болсун, ашхы умутларыбыз, тилеген тилеклерибиз толсунла. Уллу Аллах ёсюб келген джаш тёлюбюзню Ата джуртунда, ата-ана къолунда, ачыкъ кёкню тюбюнде, окъ-тоб тауушну эшитдирмей, ёмюрле узагъына джашатсын. Аллах къартларыбызгъа таркъаймазлыкъ сюек саулукъ буюрсун. Миллетле арасында шохлукъ бла бир иннетлилик кюч алыб, ёмюрлеге бегисин. Тири, джигит, шохлукъну сюйген халкъым, Джангы джылда джангы джетишимлеге ие болуб, учун аллынга!

Доюнланы Абдурахман,
РФ-ны Джазычуларыны союзуну къурамында болгъан, КъЧР-ни махтаулу устазы эмда махтаулу журналисти.

Сюйген миллетим!
Джангы джыл бла алгъышлай, сеннге кёб ашхылыкъ, игилик теджейме. Хар юйде, юйдегиде къууанч, насыб, рахатлыкъ, джетишим къуру да бегиб турсун. Адамла, джюрек джылыуларын халкъгъа бере, аны дагъаны болуб, джуртха, миллетге сый, махтау келтириб турсунла, аланы огъур кючлери таркъаймасын.
Этген ашхы муратлары толсунла. Джаш тёлюбюз Джуртха кертилик тутхан, тюз иннетли адамла болсунла. Саныбыз мелиуаннга чыгъа, бешикле кёб болсунла миллетибизде.
Барыбыз да, арада къарнаш шохлукъну кючюн бегите, тюз джолну барыб, ашхы муратларыбызгъа джетейик. Тюз иннет, таза сезимле тёгерекге джайылсынла. Джангы джылда кёб сууаб иш этейик. Бютеу дуниягъа алгъыш эте, таукел алгъа барайыкъ. Акъыл, фахму, билим, берекет хазнабыз кёб болсун. Таулада булбулла джырласынла, буула ёкюрсюнле, джугъутурла ойнасынла. Рахат кёкню мийигинде ётгюр къушла учсунла.
Бир Аллах барыбызгъа да къууанч, насыб, саулукъ, узакъ ёмюр берсин. Хаман да тутхан ашхы ишибизден къууанайыкъ.

Батчаланы Манаф,
РФ-ны Джазыучуларыны союзуну къурамында болгъан, джамагъат къуллукъчу.