Джашауубузну джарыгъы ёсюб келген сабийледиле. Аланы боллукъду, хар неге да ёсюм алдырыб, дунияны игилендирир хыйсаблары. Аны ючюндю къралыбызны, республикабызны да башчылыкълары сабийли юйдегилеге айырыб эс бёлдюргенлей, кёлтюргючлюк этдиргенлей тургъанлары.

Аны ючюндю бурундан да дуниягъа сабий джаратылгъанына, къуру ата-ана болуб къалмай, бютеу джамагъат къууаннганы.
Бу озуб баргъан джыл кёб тюрлю сынау теджесе да, келир заманыбыз ышаннгылы болур ючюн, сабийлерибиз эркин къралда рахат джашар ючюн, Миллет Башчыбыз тыйыншлы оноула этиб, кърал къуллукъчула ол айтханны баджарыргъа кюрешиб, СВО-гъа къошулгъан джигитле ётгюрлюк танытыб, бютеу джамагъат да алагъа кёл бериб, ол сынауладан сый бла ётюб барабыз, джетишимлерибизни къатлайбыз.
Аны себебинден, сабийле къураргъа базгъан юйдегилени саны да ёседи. Сёзден, быйыл, Джангы джылгъы байрамгъа аталгъан газет басмагъа хазыр этилген кёзюуге дери, миллетибизге, республикабызгъа къошулгъан балаланы саны ёсгенден ёсе барады.
Бизни хар кюнюбюзню да джарытхан балалагъа Аллах сюек саулукъ, уллу насыб, ата-ана ышыгъында узакъ ёмюр берсин. Туугъан джуртларыны, миллетлерини сыйларын мийикде тутарыкъ, къралыбызны ёсюмюне юлюш къошарыкъ онглу адамла болуб ёсерге буюрсун.