Черкесскени Маданият къаласында кемизли эмда социал учреждениеледе джашагъан сабийлеге аталгъан КъЧР-ни Башчысыны Нызысы бардырылгъанды.

Къарачай-Черкесияны Башчысыны атындан сабийлени КъЧР-ни урунуу бла социал ёсюмюню министри Хачирланы Кемал джылы алгъышлагъанды.
Къыйын болумгъа тюшген сабийле бла кёб башлы юйдегилени сабийлерине да этилгенди Башчыны Нызысы.
– Сиз неге да тёзе билген гитче джигитчиклесиз. Мен сизни къайсы биригиз да джашауда кесигизге тыйыншлы орун айырлыгъыгъызгъа, онглу джетишимлеге ие болургъа къолугъуздан келлигине да ийнанама. Джангы джылда этген муратларыгъыз толсунла, – дегенди Хачирланы Кемал.
Сабийле республиканы Башчысыны Нызысында уллу зауукъ этгендиле. Алагъа таурухлу къонакъла кёб сейир зат кёргюзгендиле, кёллерин кёлтюргендиле. Бютюн да Буз Акка бла Туудукъчугъуна сабийле бек къууаннгандыла. Аланы эмда бир-бирлерини къолларындан тутуб, омакъ нызыны тёгерегине баргъандыла, тепсегендиле, джырлагъандыла. Сабийлени кёзлерин ачар иннетде тюрлю-тюрлю оюнла бардырылгъандыла.
Маданият къаланы адамла джыйылгъан залында сабийлеге Джангы джыл бла байламлы спектакль да кёргюзгендиле. Айтыргъа, сабийлени бек разы этгендиле.
Байрамны аягъында аланы хар бирине КъЧР-ни Башчысыны татлы затладан толгъан саугъасын да бергендиле.