2025-чи джыл тарихге кетеди. Огъур бла келсин джангы 2026-чы джыл.
Не зат бла эсде къалды бу джыл? Къаллай тюрлениуле, нелляй джангылыкъла болдула? Къайсы муратла толдула, къайсы умутла джарты джолда къалдыла?

Быйыл джыл Уллу Ата джурт къазауатда Хорламыбызны 80-джыллыгъы болуб ётдю. Аны кёл кёлтюрюм бла уллу байрам этиб белгиледик. 2025-чи джыл «Ата джуртну къоруулаучуну джылы» деб баямланнганы себебли, джылны аллындан аягъына дери джуртха сюймекликни танытхан кёб иш этилди. Республикабызны джамагъаты бу ишде бирикмекликни танытды.
Дунияны башында бютеу миллет бирден излеген – ол, сёзсюз да, мамырлыкъды, къартларыбыз айтыучу кърал тынчлыкъды. Кесибизни къралда баргъан аскер къаугъа къой эсенг, хоншу къраллада болгъан къазауатлагъа да джарсыйды джюрегибиз. Къазауат, къаугъа да бошалыб, аскерчи джашла да юйлерине хорлам бла къайтсала деб сакълайбыз. 2026-чы джыл ол муратла толуб, бири бирибизге сюйюмчю айтырлай этсин Уллу Аллах.
Аскерчилеге болушлукъ эте, къазауатда болгъан джашлагъа джылы кийимледен башлаб, хычынлагъа, аскер техникагъа дери таймаздан ашыргъанлай турадыла республикабызны башчылыгъы эмда джамагъаты.
Джуртубузда рахатлыкъ сакъланнганы уллу насыбды. Ол насыбыбызны кючюнден республикабызда джаш адамланы юйдеги къурагъанлары, сабийле къошулгъаны, къууанчла-байрамла болгъаны – джашау алгъа баргъанын шагъатлайдыла.
Быйыл республикабызны ара шахарына 200 джыл толгъаны уллу байрам болду. Кесин да республикабызны туугъан кюню бла бирге къууанч халда белгиледик.
Бизни ана тилибиз, къарачай-малкъар тил, Яндексге тюшгени да бек уллу джетишим болду. Тилибизни сакъларгъа ол зат иги болушлукъ этерикди.
Андан сора да кёб ашхы иш этиледи. Мындан ары да кърал тынчлыкъда Джуртубуз джашнай, чагъа барыргъа буюрсун Уллу Аллах. Сёзсюз да, хар инсан да, энчи насыб излейди, саулукълу, джетишимли болургъа сюеди. Ол муратлары да толсунла. Аллах огъур джыл этсин аллыбыздагъы 2026-чы джылны!

Къоркъмазланы Салима.