Эндреуюк (декабрь) айны 25-де Эресейни Президенти Владимир Путин Кърал советни кенгешин бардыргъанды. Анда кадрла бла байламлы ишлени юсюнден сёз баргъанды.

Президент кенгешин магъаналы билдириуден башлагъанды – 2026-чы джылны Эресейни халкъларыны бирлигини джылы этиб баямлагъаныны юсюнден Указгъа къол салгъанын айтханды.
«Къарачай-Черкесияча кёб миллетли регионлада халкъланы бирлигини энчи магъанасы барды. Миллетле арасы джарашыулукъ рахатлыкъны, мамырлыкъны тамалын салады, маданият байлыкъны сакълайды. Биз мындан ары да миллетлени арасында шохлукъну бегитиуге аталгъан башламчылыкъны джакъларыкъбыз, барыбызны да бирикдирген маданият, билим бериу, спорт ишлени бардырлыкъбыз. Эресейни халкъларыны бирлигини джылында ана тиллени, адетлени сакълаугъа, миллетле арасы байламлылыкъны ёсдюрюуге да уллу эс бёллюкбюз», – деб джазгъанды КъЧР-ни Башчысы Темрезланы Рашид МАХ мессенджерде.