Газетни эндреуюк (декабрь) айны 11-де чыкъгъан 93-чю номеринде Къарачай шахарда джашагъан 84 джыл болгъан тиширыу, кесин аманлыкъчылагъа алдатыб, юйюню арбазында хыйлачыла ийген биреуленнге кесини джыйыб тургъан ачхасын бергенини юсюнден джазгъан эдик.

Бу кюнледе КъЧР-ни МВД-ны къуллукъчулары, тинтиу ишле бардырыб, тиширыуну ачхасын алыб кетген адамны тутхандыла. Ол Ставрополь крайны Михайловск шахарындан 21 джыл болгъан студент джаш болуб чыкъгъанды. Оператив информациягъа эмда джаш адамны айтханына кёре, ол кеси да аманлыкъчыланы «къапханларына» тюшгенди.
– Мен танымагъан бирле, меннге къонгурау къагъыб, ётюрюклени айтыб, онлайн-банкга келген кодну билгендиле. Ызы бла «джорукъ сакълагъан органланы къуллукъчулары» байламлылыкъгъа чыгъыб: «Сени банк счётунгдан Эресейде тыйгъыч салыннган организациягъа ачха тюшгенди. Ол кемликни тюзетир ючюн, сен «джашыртын агент» болуб, биз берген джумушну тындырыргъа керексе», – дегендиле. Мен, алагъа ийнаныб, Къарачай шахаргъа барыб, 84 джыл болгъан тиширыудан ачха алыб, аманлыкъчыла айтхан счётха ашыргъанма, – деб, хапар айтханды джаш адам.
Бюгюнлюкде полицияны къуллукъчулары аманлыкъчыланы ачыкълау бла байламлы ишле бардырадыла.
КъЧР-ни МВД-сы республикада джашагъанланы сакълыкъгъа чакъырады. Сиз танымагъанла къонгурау къагъыб, биз джорукъ сакълагъан органланы, банкланы, башха организацияланы къуллукъчуларыбыз деселе, алагъа чыртда ийнанмагъыз. Ала сизни къоркъутуб, тюрлю-тюрлю лагъымланы хайырландырыб, энчи информациягъызны билирге излейдиле. Аллайла бла сёлешиб айланмай, телефонну салыб къойгъандан игиси джокъду. Кесигизни алдатмазгъа кюрешигиз.

КъЧР-ни МВД-ны пресс-къуллугъу.