Мындан алда Къарачай-Черкес Республиканы джыйым командасы спортну самбо тюрлюсюнден Шимал Кавказ федерал округну биринчилигине къошулгъанды. 16–18 джыл толгъан джашла бла къызла хорлаб, 13 медалгъа ие болуб, саулай Эресейни алчылары къошуллукъ эришиулеге 7 путёвка алгъандыла.

«Къарачай-Черкес Республиканы спортчулары, тюрлю-тюрлю ауурлукълада ёчлю орунланы алыб, мийик джетишимле кёргюзгендиле. Хорлагъанла бла кюмюш медалла алгъанла региондан Эресей дараджада 2026-чы джыл башил (январь) айда Краснодарда бардырыллыкъ спорт эришиулеге къошулургъа мадар табхандыла», – дегендиле Къарачай-Черкес Республиканы Физкультура бла спорт министерствосунда.
Шимал Кавказ федерал округда бардырылгъан эришиуледе Камиль Ибрагимов 49 килограмм ауурлукъда, Сюйюнчланы Адам 88 килограмм ауурлукъда, Стефания Кириллова 59 килограмм ауурлукъда алтын медалла, Азамат Малеев 64 килограмм ауурлукъда, Рашид Бетуганов 79 килограмм ауурлукъда, Амаль Чиков 88 килограмм ауурлукъда, Гочияланы Борис 98 килограмм ауурлукъда кюмюш медалла, Батчаланы Амир 58 килограмм ауурлукъда, Лепшокъланы Адам 64 килограмм ауурлукъда, Семенланы Алим 79 килограмм ауурлукъда, Алим Дагужиев 53 килограмм ауурлукъда джез медалла алгъандыла.
Аланы эришиулеге белгили юретиучюле Къочхарланы Умар, Байкъулланы Камал, Байчораланы Пилял, Бостанланы Аслан, Эбзеланы Арасул, Марат Абитов, Азамат Охтов, Арсен Пшнатлов хазырлагъандыла.
Ол эришиулеге Шимал Кавказ федерал округну 7 регионундан 250 спортчу къошулгъанды.

Узеирланы Хусей.