Бу кюнледе Пристань школну окъуучулары эресейчи аскерчилеге джораланыб бардырылгъан «Спасибо тебе, солдат!» деген патриот акциягъа тири къошулгъандыла.

«Бу ишни джаш тёлюню патриотлукъгъа юретиуде магъанасы уллуду. Ол школчулагъа кеслерини къралны тарихи бла танышыргъа, аны бла байламлылыкъ тутаргъа болушады. Алай бла, джаш адамла Уллу Ата джурт къазауатны заманында, бусагъатда СВО-да, джигитлик танытыб, къралыбызны къоруулагъанладан хапарлы боладыла», – дегендиле Къобан районну администрациясыны пресс-къуллугъунда.
Школчула Джуртну сакълагъанлагъа, джууаблылыкъларын терен сезиб, сюйюб, разы болуб письмола, открыткала, саугъала хазырлагъандыла. Этилген иш аскерчилеге учунмакълыкъ береди, аланы юйлеринде сакълаб тургъанларын эсгертеди.
«Спасибо тебе, солдат!» деген акция аскерчилени кёллерин кёлтюрген ишди. Аны тамалында уллула, гитчеле да аскерчилеге, ала джау бла къанларын, джанларын аямай сермешгенлери ючюн, разылыкъларын, бюсюреу этгенлерин билдиргендиле. Сабий письмолада аскерчилеге берилген уллу сый, махтау, джылыу барды.

(Бизни корр.).