Эндреуюк (декабрь) айны 1-де «Бирикген Эресей» партия Халкъ программасыны тамалында ишленнген объектле бла танышыугъа аталгъан уллу сурат конкурс баямлагъанды.

Хар кюн сайын дегенча, «Бирикген Эресей» партияны башламчылыгъы бла аны Халкъ программасыны тамалында уллу къралыбызны джер-джеринде джангы ишленнген социал объектле хайырланыугъа бериледиле, машина джолла, кёпюрле деменгили эмда къоркъуусуз этиледиле. Аллай ишле бизни республикада да тири бардырыладыла. Заманны излемине келишген школланы, поликлиникаланы, таб джарашдырылгъан арбазланы кёрсек, барыбыз да бек къууанабыз. Энди кесибиз къууанган бла къалмай, аланы ариу суратлагъа тюшюрюб, «Бирикген Эресей» партияны кючю бла джашауубуз къалай тюрленнгенин башхалагъа да кёргюзюрге, ол джангы объектлени суратларын конкурсха къошуб, иги саугъала алыргъа да боллукъбуз.
Конкурс «Импульс развития», «Родина вдохновения, «Будущее в наших руках», «Комфортная жизнь», «Территория возможностей» деген номинациялада бардырылады. Хар номинацияда баш ёчге 300 мингишер сом салыннганды. Аны кибик 2-чи, 3-чю орунланы алгъанлагъа да иги ачха саугъала хазыр этилгендиле. Бютеу къралдан 15 иги ишни автору саугъаланныкъды.
Конкурсха джылы 18-ден атлагъан хар эресейчи да 2026-чы джылны алтотур (март) айыны 1-не дери 5 ариу суратны теджерге боллукъду. Теджелген суратла
2021-чи джылдан бери тюшюрюлгенле болургъа керекдиле. Суратлагъа багъа бютеу джамагъат берликди. Халкъ сайлаула 2026-чы джыл арттотур (апрель) айны 15-не дери барлыкъдыла. Хорлагъанланы атлары келир джыл хычаман (май) айны 1-не дери белгили боллукъду.
Конкурсну юсюнден толу хапарны естьрезультат.рф/ ссылка бла кириб окъургъа, анга къошарыкъ суратлагъызны да алайда салыргъа боллукъду.

Газетни информацион къуллугъу.