Эресей гвардияны КъЧР-де бёлюмюню къуллукъчулары республикабызны школларында сохталагъа Белгисиз солдатны кюнюне аталгъан «Ётгюрлюкню дерсин» бардыргъан эдиле.
Аны чегинде ол мероприятие Къарачай шахарда да ётгенди. Къарачай шахарны 1-чи номерли школунда МВД-ны Къарачай районда джорукъ сакълагъан бёлюмюню ветеранларыны советини председателини эмда ведомствону тышында къараууллукъ этген бёлюмюню къуллукъчуларыны башламчылыгъы бла бардырылды ол.
МВД-ны ветеранларыны советини (биринчи къуралгъан организациясыны) председатели, милиция-
ны отставкадагъы майору Къобанланы Исмаил сохталагъа бу эсгериу кюн къачандан бери, не чурум бла башланнганыны юсюнден хапар айтханды. Сабийле аны хапарына эс бёлюб тынгылагъандыла. Ала ол кюн ветеранланы ауузларындан талай джангы затны эшитгендиле. Сёз ючюн, Уллу Ата джурт къазауатда джау бла сермеше джан берген Белгисиз солдатны сюеклерин къазыб табыб, алайдан келтириб, джигитге тыйыншлы сый бериб, 1966-чы джыл эндреуюк (декабрь) айны 3-де Москва шахарны Александровский садында асырагъандыла. Белгисиз солдатны сыйына уллу эсгертме да салыннганды. Андан бери Джуртубузну къоркъуусузлугъун сакълагъан санагъатны, окъуу учреждениелени къуллукъчулары, школланы устазлары бла сохталары – бютеу къралыбызны гражданлары да хар джыл сайын бу кюнню Белгисиз солдатны кюнюча белгилейдиле, аны сыйына атаб, эсгериу джыйылыула бардырыладыла. Уллу Ата джурт къазауатны отлу джылларында уа аты-чууу белгили болмай къалгъан, тоб атылыб, юслери топуракъ бла басдырылыб, джер джутхан аскерчилени саны уа къаллай бир болгъанды, аны санын бюгюнлюкде да киши айталмайды. Къобанланы Исмаил аланы юсюнден джаш тёлюге чертиб айтды.
Эресей гвардияны къуллукъчулары сохталагъа дагъыда «Штыки» деген мемориал комплексни, Белгисиз солдатны къабырыны скульптурасы къалай ишленнгенини юслеринден да хапар айтдыла.
Джыйылыуну аягъында сохтала келген къонакълагъа уллу магъанасы болгъан тюбешиу къурагъанларына, керекли дерс бергенлерине разылыкъларын билдирдиле. Андан сора Эресей гвардияны ветеранлары Орджоникидзе посёлокда Белгисиз солдатны къабырын джокълаб сый бердиле, гокка хансла да салдыла.
Духина В.Н.,
Эресей гвардияны КъЧР-де управлениесини пресс-къуллугъуну тамадасы, полицияны подполковниги.
