Эндреуюк (декабрь) айны 3-де Сакъатланы халкъла арасы кюню белгиленди. Бу байрам адамлагъа хар инсанны да багъалылыгъын эмда огъурлулукъ бла джакъчылыкъ кишини къолундан келмезлик затланы болдургъанларын эсгертеди.

Ол кюн байрам джыйылыу «Забота» атлы республикан сабий интернатда-юйде да ётдю. Сабийле келген къонакълагъа насихатчылары бла бирге хазырлагъан программаларын кёргюзгендиле.
Джыйылыуну учреждениени сохталары кеслери хазырлагъан джумушакъ сезимли тепсеулери бла ачдыла. Сабийле сахнадан джашауда не тюрлю болумдан да сезимле кючлю болгъанларын ангылатыргъа кюрешдиле. Алагъа къонакъгъа регионну сюд системасыны, налог къуллугъуну, Къарачай-Черкесияда медицина-социал экспертизаны баш бюросуну, «РусГидрону», Сюдю приставланы федерал къуллугъуну, район администрацияланы келечилери, дагъыда кёб меценат бла сууаблыкъ этгенле да баргъан эдиле.
– Сабийле ишчиле бла бирге хар бир номерлерин да бек иги хазырлагъандыла. Алай демеклик, джукъ чийсил къалыргъа мадар джокъ эди. Хар не да, къарагъан адам олсагъат огъуна ангылаб барырча, къуралгъанды, – деб хапар айтды «Забота» атлы республикан сабий интернатны-юйню тамадасы Червонова Елена.
Республиканы урунуу бла социал ёсюмюню хакъындан министри Хачирланы Кемал къонакълагъа, сабийлени сансыз этмей, эс ийиб къарагъанлары ючюн, разылыгъын билдирди. Социал учреждениени къуллукъчуларын а саугъала бла, хурмет къагъытла бла белгиледи.
– Сиз джаныгъыз саулукъда эсгертмеле салыргъа тыйыншлы адамласыз. Былайда этген къыйын къуллугъугъуз ючюн, мен сизге мардасыз берекет, насыб эмда сюек саулукъ тилейме. Сиз бу сабийчиклеге берген джылыуугъуз минг кереге къатланыб къайтсын кесигизге, – деб сёлешди Хачир улу.
Сабийле юч джау чыракъны юсю бла «Умутха», «Ышанмакълыкъгъа» эмда «Сюймекликге» аталгъан терен магъаналы сахна оюнларын кёргюзгенлеринде, кёблени кёзлеринде джыламукъла джылтырагъан эдиле.

Халкёчланы Ахмат.