Мындан алда Москвада «Россия – страна возможностей» деген президент платформаны тамалында «Эресейни халкъларыны ассамблеясы» деген джамагъат-кърал бирлешликни уллу джыйылыуу (съезди) болгъанды. Анга къралыбызны джер-джеринден делегатла къошулгъандыла.
Ол джыйылыуда «Эресейни халкъларыны ассамблеясыны» Къарачай-Черкесияда бёлюмюню тамадасы, «Къарачай» газетни баш редактору Къоркъмазланы Хасанны къызы Салима да болгъанды.
3 кюнню ичинде «Ассамблея народов России» деген джамагъат-кърал бирлешликни тамадасы Владимир Васильевни башчылыгъы бла 96 делегат, тюрлю-тюрлю семинарлагъа, «тёгерек столлагъа», ачыкъ ушакълагъа къошулуб, къралыбызны миллет политикасын толтурууну юсюнден кенгешгендиле, миллетле арасы шохлукъну, джарашыулукъну бегитирге джарарыкъ оюмларын айтхандыла. Ала къралны миллет политикасын джамагъатха ангылатыуну хакъындан билимлерин да ёсдюргендиле.
Анда миллетле арасы келишиулюкню ёсдюрюуде уллу сынамлары болгъан экспертле «Межнациональное единство и общественная гармония как залог внешнеполитического успеха», «Цивилизационная идентичность России», «Противодействие экстремизму в социальных сетях» дагъыда башха темалагъа докладла этгендиле.
Джыйылыуда келир джыл «Год единства народов России» деб, баямланнганы бла байламлы кёб миллетни келечиси къошулгъан бирлешликни иши бир да магъаналы боллугъу чертилгенди. «Эресейни халкъларыны ассамблеясыны» хар регионда бёлюмюню башчысына да миллетле арасы келишиулюкню ёсдюрюуню хакъындан уллу джууаблылыкъ салыннганды.
Владимир Васильев регионал бёлюмлени тамадалары миллетле арасы шохлукъну бегитиуге аталгъан профилактика ишледен сора да, къаллай болса да бир чурум бла дау чыгъа башласа, аны къаугъагъа джетдирмей тыяр амалла этерге борчлу болгъанларын айырыб айтханды.
«Хар биринге къарайма да, къайгъырыулу адамла болгъаныгъыз танылыб турады. Бизни иннетибиз бир болгъанын сеземе. Къралыбызны онгун алыргъа излегенле кёб миллетли джамагъатыбызны арасында къаугъала чыгъарыргъа дыгалас этгенлей турадыла. Биз алагъа джол бермезге керекбиз. Миллетле арасы хар ишге да иги эс бёлюб, не аз да чийисил зат кёргенлей, кемликни тюзетир джанындан болугъуз. Хар биринг да рахатлыкъны сакъларгъа джарар деген оюмларыгъызны айтыгъыз», – дегенди Владимир Абдуалиевич.
Алай бла, «Эресейни халкъларыны ассамблеясы» деген джамагъат-кърал бирлешликни регионлада бёлюмлерини тамадалары, кеслерини джерлеринде джамагъат-политика болумну юсюнден хапар айтыб, аны игилендирирге боллукъ оюмларын теджегендиле.
Къоркъмазланы Салима да Къарачай-Черкесияда миллетле арасы келишиулюкню ёсдюрюуге, шохлукъну бегитиуге не заманда да иги эс бёлюннгенин, бизни республикада кёб миллетни келечиси джашаса да, ала бары да, бир-бирлерине сый бере, бурундан да ашхы хоншула болгъанларын чертгенди. Миллет адетлерибизден, тарихибизден, маданиятыбыздан хапар айтыб, джыйылгъанланы бизни республикада джашагъан халкъла бла шагъырей этгенди.
Алай бла, 3 кюнню ичинде делегатла миллетле арасы келишиулюкню ёсдюрюуде сынамлары бла алмашыб, бир-бирлеринден да, усталадан да кёб ашхы затха юрениб, джашагъан джерлеринде рахатлыкъ сакъланыр ючюн, къолларындан келгенни этерге кёллениб чачылгъандыла.
СОЛТАНЛАНЫ Зульфия.
