«Билим» общество «Билим.Ёч.» саугъагъа тыйыншлы болгъан адамланы тизимин басмалагъанды. Ол адамла Эресей Федерацияны субъектлерине билим джайыуда эм уллу джетишимлеге ие болгъандыла.
Къарачай-Черкесиядан аллай адамгъа Хапчаланы Юсюпню джашы Салых саналгъанды. Ол Байрамукъланы Халимат атлы кърал миллет библиотеканы директоруду. Айтыргъа, Хапчаланы Салыхны башчылыгъы бла уллу проект, кёб тому болгъан электрон китаб, чыгъыб тебрегенди. «Эсгериуню китабы. Хорлагъанла» – алайды аны аты. Китабда Уллу Ата джурт къазауатда Ата джуртларын сакълагъан ётгюр джердешлерибизден хапар айтылады.
Хапча улуну башчылыгъы бла библиотеканы къуллукъчулары 2024-чю – 2025-чи джыллада уллу излеу-тинтиу иш бардыргъандыла: фронтдан келген письмола эмда архив материалла бла шагъырей болгъандыла, ветеранланы таныгъанладан, аланы джууукъ адамларындан хапар джыйгъандыла. Энди библиотеканы сайтына кирген ол китаб бла шагъырей боллукъду. Ёсюб келген тёлюледе патриот сезимлени айнытыуда аны уллу магъанасы болгъаны хакъды.
Алайды да, Хапчаланы Салых Къарачай-Черкес Республикада эм иги билим джайыучуду (просветитель).
Москвада «Билим.Ёч.» саугъаны Сыйлы жюрисини кенгешин, Эресейни Президентини Администрациясыны тамадасыны биринчи орунбасары, «Билим» Эресей обществону къараучу (наблюдательный) советини председатели Сергей Кириенко ачханды. Ол айтханнга кёре, быйыл биринчи кере къралны 89 субъектинде эм иги билим джайыучу бла билим джайыугъа аталгъан эм иги проект саугъагъа тыйыншлы боллукъдула. Ала биринчи кере «Билим.Ёч.» деб регионал саугъаланы аллыкъдыла. Быллай зат билим джайыуну тарихинде биринчи кере болады.
Эм иги билим джайыучу проектге КъЧР-ден басмачы Цвижба Абзагу Геннадиевични «Этнокультура билим: Эресейде кёб тюрлю миллет адетлени сакълау» проекти саналгъанды.
Проектни баш мураты къралыбызда джашагъан халкъланы тиллерин, тарих эмда маданият хазналарын тюз эмда файдалы хайырландырыуду. Алай бла, 2024-чю – 2025-чи джыллада Эресейни беш регионунда миллет маданият бла байламлы 20 класс ачылгъанды, 500 устаз хазырланнганды, 30 онлайн-дерс бардырылгъанды. Бу проектге эс бёлгенлени саны кёбдю.
Регионал саугъалагъа тыйыншлыланы «Билим» обществону эксперт совети белгилегенди. Аны къурамына Эресейни бютеу субъектлеринден 300-ден аслам адам киргенди. Хар заявкагъа беш эксперт къараб багъа бергенди.
Алайды да, джердешлерибизни уллу хунерлик джетишимлери бла алгъышлайбыз. Мындан ары да тутхан ишлеринден бет джарыкълы болурларын излейбиз.
Тариэль Дина.
